Lafaek News—Embaixadór Uniaun Europeia Iha Timor-Leste, Andrew Jacobs, informa, konfirmadu EU prontu apoiu Timor-Leste hodi luta hasoru Covid-19 no ajuda mos ema ho vulneravel sira.
“Ha’u konfirma ona katak Uniaun Europeia sei kontinua apoia Timor-Leste iha luta hasoru COVID-19, Ita sei kontinua fo apoiu ba servisu Organizasaun Mundiál Saúde nian no ita sei kontinua ajuda ema sira ne’ebe vulneravel liu-liu husi organizasaun sosiedade sivil nian sira,” dehan Embaixadór UE, Andrew Jacobs, ba jornalista sira hanfoin hasoru malu ho Vise PM no MSSI, Armanda Berta dos Santos, iha kaikoli, kinta, (25/02/2021).
Xefe deplomátiku Uniaun Europea ne’e afirma, relasiona ho vasina ne’ebé atu implementa UE no nia nasaun membru sira finansia porsentu 50, husi orsamentu Fasilidade Global COVAX nian Dolar Amerikanu Billiaun 1.
“COVAX la kleur tan sei halo vasina uluk ne’ebé disponivel iha Timor-Leste, tanba importante ba Uniaun Europeia katak nasaun parseiru sira hotu iha asesu ba vasinasau no la iha ema ida mak seguru husi Covid to’o ema hotu moris hakmatek,” tenik nia.
Apoiu ne’e susesu husi diálogu polítiku nivel aas entre Timor-Leste no Uniaun Europeia ne’ebe hala’o iha fulan Janeiru nia rohan.
“Ami konkorda katak diálogu ne’e haforsa parseria metin entre Uniaun Europeia no Timor-Leste, bazeia ba valor sira demokrasia nian, direitus umanus, multi-lateralismu no defeza ba orden intenasional bazeia ba estadu direitu,” nia hakotu.
Jornalista : Pedro de Almeida
Editora : Nelya Barros
