Lafaek News— Martinho da Costa Oliveira, hamonu matan-wen, hafoin vizita direta ba família kbiit laek Zelia ho Olandino, iha ne’ebé moris iha susar laran, kondisaun uma la dignu no nesesidade uma laran mamuk.
Susar ho terus ne’ebé uma kain ne’e hasoru, soke Martinho nia laran dodok hodi hamonu nia matan-wen bainhira hakat tama iha uma laran hodi haree saida mak família ne’e iha, uma nia kondisaun la di’ak no fatin toba la dignu.
Prosesu independénsia lala’ok la’os atu sakrifika ema balun moris halerik hodi hamoris liu ema balun moris kontente, ukun an lo-loos atu liberta povu kiik sira husi terus no susar, maibé la’os hariku balun de’it, ignora tiha povu balun iha independénsia ne’e rasik.
Ho situasaun ne’ebé família ne’e hasoru, obriga Timor-oan ida ho naran Martinho tuur la hakmatek bainhira haree notísia ne’e publika iha media lafaek news iha loron 26 Juñu 2021, iha pájina sosial, provoka kedan Timor-oan ne’e tenke kontaktu direta jornalista Lafaek News iha domingu (26/06/2021), lokraik tuku 4:35 (OTL), lori Martinho ba haree hela fatin família kbiit laek ne’e iha Beto Tasi suku Madohi postu administrativu Don Aleixo, munisípiu Dili hodi fó ajudu.
Iha entrevista, lafaek news ho Timor-oan ne’e espresa moris iha mundu, tulun malu la’os tan barak, maibé ho sentimentu umanu hakarak apoiu kbi’it la’ek Zelia dos Santos ho nia kaben Olandino M. dos Santos Ribeiro, ne’ebé sofre moras iis boot (hasma) hamutuk oan nain-4, hetan ona ai-han uituan hodi sustenta ba moris loro-loron.
Bainhira lafaek news halo publikasaun kona-ba Zelia ho nia oan nain-4, hamonu mata-wen, uma laseguru no hahan uma laran mamuk, dezafia reasaun husi Timor oan sira hodi tulun ai-han natoon, nune’e bele sustenta netik moris ne’e ba loron naruk.
“Ha’u hare’e notisia iha lafaek news, iha ne’eba públika no hatudu mós fotografia uma kbi’it la’ek nian, halo ha’u hanoin tebe-tebes, mana ho maun nia oan kiik koan, di’ak ida la han, kalan máka foin han dala ida, ida ne’e máka halo ha’u sente laran triste loos,” dehan Martinho da Costa Oliveira ho Mata wen ba lafaeknews iha aldeia beto tasi suku madhoi, postu-administrativu Dom Aleixo, Munisípiu Dili, domingo, (27/06/2021).
Martinho da Costa Oliveira servisu iha instituisaun Polísia Siéntifika Investigasaun Kriminal (PCIC), maibé apoiu ai-han ba kbi’it la’ek ne’e hanesan pesoal la reprezenta instituisaun nia naran, importante bele tulun família ne’e ho nia osan rasik.
“Uza rasik ha’u nia osan máka sosa lori mai, ha’u la’os riku no la’os osan barak, iha uituan ha’u tulun sira, hahan ida ne’e mós la’os to’o tinan ba tinan, maibé bele tahan kabun iha loron balun nia laran,” nia informa.
Iha fatin hanesan Joaquin de Martins Sarmento, nu’udar Polisia Nasionál Timor-Leste (PNTL) iha diresaun Corpu Seguransa Pesoal (CSP), asesu mós notísia (Zelia ho Olandino) no oan nain-4 nia kondisaun moris, nune’e apoiu nesesidade bázika ba sira hanesan pesoal la’os reprezenta instituisaun.
“Ha’u asesu husi lafaeknews, ha’u nia kolega rasik hare’e direita no fó hatene kronolojia kbi’it la’ek (Zelia ho Olandino), sente laran ne’e moras no hakarak ajuda sira hanesan pesoal, tanba nu’udar Timor-oan atu kalan boot mós ha’u mai ajuda,” hateten Joaquin de Martins Sarmento hafoin lori nesesidade ba tulun família kbiit laek ne’e iha Beto-Tasi.
Hafoin simu tiha tulun husi Timor-oan na’in rua ne’e Zelia dos Santos ho nia kaben Olandino M. dos Santos Ribeiro, hato’o agradese no obrigadu barak ba asaun karidade ne’ebé maluk timor oan nain rua ne’e oferese.
“Ha’u ho familia sira hakraik an hato’o agradese no obrigado boot tebes tanba nai maromak no matebian loke maluk sira nia laran hakat to’o ami nia fatin hodi ajuda ai-han ba ami, hodi tahan netik ami nia moris ba tempu loron balun nian,” dehan Zelia dos Santos.
Entertantu nessesidade bázika ne’ebé familia kbi’it la’ek ne’e simu husi Timor-oan nain rua hamutuk foos saka 2, supermi dos 3, mina lima liter 1 inklui osan $.20.
Jornalista : Pedro de Almeida
Editór : Agapito de Deus
