Lafaek News—Amelia Salsina 64 ho nia laek kaben Atanasio Mendonsa 74, hela iha aldeia Lemkari, suku Manleuana, postu-administrativu Dom Aleixo, munisípiu Dili, halo atividade tuku britas no pinera rai henek hodi suporta oan nia estudu no mós sustenta ba nesesidade uma laran inklui selu uma kost.
Amelia Salsina haktuir, durante halo atividade tuku britas ho pinera rai henek hahú iha tinan 2006 to’o ohin loron, husi serbisu nemaka hodi suporta ba oan sira nia estudu no responde ba nesesidade loro-loron.
“Ha’u serbisu laiha, ne’ebé loro-loron mai tuku britas iha mota laran deit no pinheira rai henek hodi selu oan sira nia eskola, hare’e mós ba hahan uma laran,” dehan Amelia Salsina ba jornalista lafaek news iha mota manleuana foin lalais ne’e.
Nune’e dehan, britas ne’ebé nia tuku karon ida faan ba dollar $1.00 no la’os sosa loro-loron, maibé depende deit ba ema ne’e atu mai sosa, dala ruma semana ida foin sosa dala ida, tanba ema barak maka faan britas.
“Saku ida ha’u fa’an ba $1.00 sorti di’ak ida loron ida ema sosa netik dalar uma sorti laiha semana ida mak ema foin mai sosa labarak ida dalaruma ema sosa to’o dollar $7.00 deit,” nia imforma.
Husi esforsu ida nemaka hetan netik rendimentu uituan responde ba nesesidade uma laran, selu oan nia eskola inklui selu uma ne’ebé familia Amelia ho oan sira kost ba fulan ida $30.00.
Enkuantu Amelia Salsina ho nia la’en kaben Atanasio Mendonsa iha oan na’in haat kompostu husi feto na’in rua no mane rua, entre sira na’in haat ne’e na’in rua graduasaun iha Universidade Nasional Timor Lorosa’e (UNTL) maibé seidauk hetan serbisu hanesan nia maluk sira seluk no na’in rua sei tur iha sekundario.
Tuir observsaun jornalista lafaek news iha terrenu nota, iha mota klaran loron be manas halo ema barak deskansa, maibé inan Amelia Mendonsa ho nia la’en kaben kontinua tuku britas iha lona okos, maske kosar sulin maibé la preokupa tanba nesesidade uma laran obriga. Hare’e ba karon hirak ne’ebé forma haleu nia (Amelia) nakontu ho britas hodi hein ema sosa nain sira.
Jornalista : Domingas Viana
Asisten Editor : Pedro de Almeida
