Lafaek News—Xefe Estadu Maior Jeneral FALINTIL Forsa Defeza Timor Leste (F-FDTL) Tenenti Jenerál Lere Anan Timur hateten, mina nu’udar riku ida ba povu Timor tomak, maibé aban bainrua se mak mai ukun tenke fahe riku ne’e hanesan.
“Ha’u fiar katak ita nia maun primeiru ministru atuál núdar veteranu, ita nia prezidente repúblika mós veteranu nunka hanoin aat ba ita nia povu no ba nia rain,” dehan Tenenti Jeneral Lere Anan Timur iha nia diskursu iha Monumentu Masakre Setembru Negro Kovalima, tersa (26/10/21).
Xefe Estadu fundamenta, aban bainrua jerasaun foun sira tenke jere didiak mina nia folin, labele halo balu sai riku no balu sai kiak.
“Ohin kalan ita mai iha ne’e hanesan matebian sira iha Timor tomak, ita mai iha ne’e ita halo komprimisiu ida ba sira katak imi fakar imi nia ran, imi so’e imi nia isin, ami ne’ebé sei moris ami la’o tuir no hatutan imi nia hanoin, Timor atu sai riku Timor hakarak sai dezenvolvidu hanesan nasaun sira seluk,” Lere informa.
Jornalista : Juvita dos Santos
Asisten Editór : Pedro de Almeida
