Lafaek News—Negosiante Tomas de Jesus Mendonsa ho idade 54 husi aldeia Ai-krus, suku Tulatareo, postu-administrativu Remesio, munisípio Aileu, fa’an de’it manu talin hodi sustenta ba oan nia estudu inklui nesesidade uma laran.
Tomas de Jesus iha oan nain 8 kompostu husi feto 2 no mane 6, dadaun ne’e nain 6 máka sei kontinua estudu, feto ida iha Univesidade Nasional Timor Lorosa’e (UNTL), nain ida iha sekundaria no nain haat sei iha ensinu primaria, rua seluk remata sekundaria no ensinu primaria lakontinua tanba ekonomia la suporta ona.
Rezidensia atual Tomas de Jesus Mendonsa ho nia fen no oan sira hela iha Aldeia toko-baru2, Suku Kuluhun postu Adminitrativu Kristu-Rei, munisípiu Dili, máka halo atividade produs manu talin.
Nia dehan, hahú halo atividade produs manu talin hodi faan fali ne’e iha tinan 2018 to’o ohin loron, husi nemáka bele hetan osan uituan hodi suporta ba oan sira nia estudu no mós responde ba nesesidade uma laran nian.
“Ha’u nia moris máka ho ida ne’e de’it, hahú fa’an ne’e iha tinan 2018 to’o ohin loron, husi osan hirak nemáka hare’e ba oan sira nia eskola, hahan uma laran mós,” dehan Thomás De Jesus Mendosa ba estajiada lafaeknews iha Ponte Mau-felu Bekora, sexta (13-08-2021).
Negosiante ne’e esplika, foun-foun uza osan $20.00 hodi sosa tali rafia máka mai produs ba manu talin no faan tutan ba kliente sira, loron ida bele produs to’o sanulu ba leten.
“Osan ne’ebe ha’u uza hodi sosa tali rafia ne’e ha’u nian rasik $20.00 hodi hola tali rafia rol ida máka mai produs ba manu talin, ha’u fa’an fali ida $2 dollar balun ki’ik $1 dollar de’it, sorti di’ak loron ida tomak ha’u bele hetan to’o $5 bele to’o $10.00,” nia infroma.
Nune’e mós nia relata, oan nia fututru importante tebes tanba ne’e kontinua fa’an hodi hetan rendiementu naton para suport ba oan sira nia estudu no mós hatan ba nesesidade loron-loron nian, alende fa’an manu talin nia mós hakarak produs tali ba fahi no animal sira seluk nian.
Estajiada : Crisencia Ferreira
Asisten Editór : Pedro de Almeida
