Lafaek News- Arsebispu Metropolitana Dili, Dom Vírgilio do Carmo da Silva realiza sorumutu ho Primeiru Ministru Taur Matan Ruak hodi koa’lia kona-ba atu hari’i Universidade Katólika hodi eleva kualidade Institutu Siénsia Relijioza (ICR) ba Universidade.

Arsebispu Metropolitana Dili, Dom Virgílio do Carmo da Silva SDB hateten, ohin ekipa husi Arguio Diocese Dili ninian mai halo audensia ho PM tamba sira hakarak atu atualiza oituan informasaun hanesan ema hotu hatene katak kuaze semana kotuk Arke Dioceze Dili komesa aprezenta dokumentus ba kriasaun Universidade Katólika Timorense, tanba sira rona lia anin neduni sira iha responsabilidade hodi partilla ida ne’e ho Primeiru Ministru maske lisensa sei iha Minitériu Ensinu Superior sei estuda hela.

“Ami sei la hahú husi zero, ami sei foti de’it buat ne’ebé iha ona mak ICR ne’ebé mak iha Lahane nebá, ami eleva ida ne’e nia kualidade husi institutu ba universidade, neduni to’o agora ita hamutuk universidade 18 ami sei la aumenta, ami foti de’it ida ne’e, iha nebá fakuldade ne’ebé ami foti iha 4, hanesan fakuldade sosiál rua no ezata rua,” dehan Arsebispu Dom Virgílio ba Jornalista sira iha Rezidénsia PM Faról Dili, sesta (13/08/21).

Virgílio akresenta, inisiativa ida ne’e hahú kedas iha tinan rua nulu liu ba, dezde Dom carlos nia tempu 2002, sira hahú tiha ona forma ekipa ida atu halo estuda viabiliadade depois Dom Ricardo matebian hahú sira tau primeira pedra iha Balide, hafoin Bispu Rocardo mate buat hot-hotu paradu.

“Depois ha’u tama mai iha 2016 buat barak mós lao tiha ona no hanesan iha infraestrutura ami kontinua, maibé atu hahú universidade momentu nebá tanba buat barak liu entaun ha’u laiha korajen halo ida ne’e, maibé durante tinan lima kontinua halo aprosimasaun husi dalan oioin,” informa Arsebispu.

Enkuantu dadaun ne’e husi Ministériu Ensinu Superior ho ekipa instaladora arkedioseze sei nafatin iha kontaktu oinsa atu halo realizasaun ba Universidade Katólika no tempu badak ekipa instaladora sei aprezenta programa ba Ministériu Ensinu Superior.

Jornalista           : Etelvina Sarmento
Asisten Editora  : Juvita dos Santos