Lafaek News— Inan faluk Domingas Mesquita ho idade 70, kondisaun fíziku defisiensia, moris iha ekonomia difisil, nune’e obriga nia tenke depende hahán loron ho kalan ba nia oan mane ne’ebé moris ho ai-leba.
Inan faluk ne’e kondisaun fíziku hahú husi moris hanesan ema normal, maibé defisiénsia komesa atake nia bainhira hasoru asidente motor soke iha 2017, rezulta kondisaun fíziku ne’ebé normal sai fali defisiensia no susar tebes atu buka moris hanesan ema seluk, sorte hela netik ho nia oan mane ho nia fen no nia bei-oan hamutuk nain ualu hodi bele tulun ba faluk ho ai-han loro-loron.
Venancia Lopes nu’udar feto foun ba inan faluk nee haktuir, durante ne’e inan faluk hela hamutuk ho ho nia oan ema iha uma laran hamutuk na’in 11, kompostu husi nia oan mane ho nia kaben, inklui ho nia bei oan na’in ualau, maibé oan mane ne’e hanesan ema aileba fa’an modo haleu sidade Dili hodi sustenta uma kain ne’e.
“Durante ne’e ami oan sira mak tau matan ba inan faluk ne’e tanba nia kondisaun agora la hanesan uluk maibé kada tinan hetan ajuda husi madre kongregasaun kanosiana Bekora mak fó mina foos no sasan nesesidade baziku seluktán,” Venansia dehan ba Lafaek News iha nia rezidensia kulu-hun Dili, Tersa (09/02/2021).
Venancia reafirma katak, inan faluk Domingas hanesan defisénsia hetan ona tratamentu husi dotor sira hafoin hetan asidente, maibé da-daun ne’e Avó Domingas nafatin ho kondisaun ne’ebé mak grave tebes tanba la’o la di’ak no hamriik kleur liu mintu ida ka rua hanesan ne’e de’it.
“Baihira nia oan mane ba fa’an manu nia talin iha manu futun fatin sira ne’e entaun ami sosa fali hahan fo ba Avó Domingas maibé nia han kanuru isin rua depois rai tiha balu depois mak han fila fali,” nia afirma.
Antes ne’e mós, Autoridade lokal iha postu administrativu Kristu-Rei hamutuk ho Ministériu Solidariedade Sosiál Inkluzaun (MSSI), foti ona dadus atu ajuda, maibé too ohin laiha rezultadu.
“Foin lalais Xefi Aldeia to’ok baru 02, Xefi Suku Kulu-hun, Administradór postu administrative Kristu-rei hamutuk ho MSSI mai haree direitamente hasai foto no kopi dokumentus sira maibé to’o agora laiha realidade no rezultadu ida mai inan falun ne’e,” nia preokupa.
Núne’e mos tuir jornalista Lafaek News nia observasaun iha uma ne’ebé faluk horik ba, nota katak inan faluk ne’e la’os preokupa de’it ba hahán, maibé mos preokupa ba nia hela fatin, tanba fatin ne’ebé nia toba la sufisiente no tempu udan inan Domingas labele toba hakmatek tanba udan ben tama liu uma laran no inan faluk nia toba fatin.
Jornalista : Domingas Viana
Editora : Nelya Barros
