Lafaek News--Primeiru Ministru Jenerál Taur Matan Ruak hatete, husu CNE ho STAE halo preparativus di’ak hodi hasa’e taxa partisipasaun ba iha eleisaun presidensiál segunda ronde.
Primeiru Ministru Jenerál Taur Matan Ruak hato’o asuntu ne’e hafoin remata enkontru semanal ho atùal Presidente Repúblika, Francisco Guterres Lú Olo iha Palasíu Prezidénsiál Bairu-Pite, kinta (24/03/22).
Atu hasa’e taxa partisipasaun ba eleisaun segunda ronde nian, preparativu sira ne’e husi CNE ho STAE halo makas governu nia apoiu mak oinsá mak sira nia atividade sira ne’e lao di’ak, no mos reforsa sira nia seguransa iha atividade sira ne’e atu nune’e labele iha problema iha dalan dalan”, dehan Primeiru Ministru Jenerál Taur Matan Ruak hafoin hala’o enkontru semanal ho atùal Presidente Repúblika Francisco Guterres Lú Olo iha Palasíu Presidensiál Bairo-pite kinta 24/03/2022.
Xefe governu ne’e afirma, nia parte haree husi prosesu eleisaun ELPREZ ronde dahuluk nian iha difikuldade liu-liu mosu iha sentru votasaun paralelu, CNE ho STAE presiza organiza oinsá ema ida-idak bele fila ba votu iha munisipiu.
Governu laiha orsamentu ba iha paralelu, enkuantu iha ba iha eleisaun primeiru ronde no segunda ronde nian de’it”, dehan PM Taur.
Iha enkontru semanal ne’e Primeiru Ministru Jenerál Taur Matan Ruak ho atùal Presidente Repúblika Francisco Guterres Lú Olo toka asuntu kona-ba preparativu eleisaun presidensiál Segunda ronde nian no ko’alia mos sobre esforsu halo kampana Vasinasaun ba Covid-19.
Jornalista : Rita Moniz
Editór : Agapito de Deus
