Lafaek News–Eleisaun Presidensial ba períodu 2022-2027 ne’ebé atu hakat ba ronde daruak iha tempu paskua, Arcebispo Metropolitano Dioseze Dili, sei hato’o karta ba Xefe Estadu Francisco Guterres Lú Olo, atu festa demokrasia sei to’o de’it loron kuarta feira, nune’e sarani katólika hakmatek hodi selebra loron paskua.
Arcebispo Virgilio do Carmo da Silva hato’o asuntu ne’e hafoin partisipa iha inagurasaun Universidade Katólika Timorense (UCT) iha Balide, kinta, 24/03/2022.
Festa demokrasia la’os iha kuaresma de’it, maibé mós termina kedas iha semana santa iha dia 16-17, ne’e duni ami hanoin atu halo karta ida dirije ba na’i ulun sira ne’ebé responsavel, ita nia kampaña halo to’o de’it kuarta feira santa, atu nune’e kinta feira, sesta feira santa no sábadu aleluia, ita fiar sarani ida ne’ebé maioria nasaun katólika ne’e pelu-menus povu hakmatek ba atu selebra nia paskua,” dehan Arsebispo Metropolitano Dioseze Dili, Virgilio do Carmo da Silva ba jornalista iha UCT Balide.
Arcebispo hatutan, karta ne’ebé atu apresenta planu ida episkopal ninian, maibé defende ba iha responsavel sira atu tau konsiderasaun ka la’e, hakarak hasa’e povu nia lian tanba nasaun Timor-Leste maioria katólika.
Karta ne’e sei deriji ba xefe estadu, depois hato’o ba CNE, STAE ba parte hotu-hotu, la’os obrigasaun maibé ne’e povu ho igreja nia lian ita hato’o tuir lei, pois hein resposta husi xefe estadu, tanba ita nasaun maioria katolika no imi hatene ona katak kampaña ne’e saida maka akontese, iha kampania ne’e dala ruma soke malu hela deit, entaun hakmatek uituan ba selebra tiha lai, tanba molok tama ba loron tolu (tridun paskal) ne’e ita bele hakmatek uituan molok tama ba paskua,” nia Arsebispo imforma.
Alende ne’e mós Arsebispo husu ba joven sira atu hatudu nafatin maturnidade politika hodi hametin paz no estabilidade no hatudu ba mundu internasional katak nasaun Timor-Leste mós bele.
Ita hare’e katak Timor oan liuliu joven sira hatudu ita nia maturidade politika, ita kontinua aumenta pontu ba iha mundu internasional kontinua haree ba ita nia reasaun hirak ne’e hodi fó nafatin valoriza fó folin, hare’e katak nasaun joven, maibé ho demokrasia foun ba Timor, maibé Timor oan sira nafatin hakaas an atu hatudu ezemplu ida ba mundu,” nia sujere.
Jornalista : Pedro de Almeida
Editor : Agapito de Deus
