LafaekNews–kandidatu Prezidente Repúblika ronde daruak Francisco Guterres Lú Olo, afirma husu kandidatu ne’ebé avansa ba ronde daruak atu ko’alia lolos de’it programa kandidatu ida nian atu evita insultu malu.
Kandidatu Francisco Guterres Lú Olo deklara asuntu ne’e liu husi konferensia imprensa ne’ebé mak lee sai husi representante legal ekipa susesu Fernando Gusmão iha hotel luz Clarita kinta ne’e.
Ha’u fiar katak ita hotu sei atua di’ak liután iha segunda kampaña no kandidatu ida-idak bele hato’o ninia kompromisu loloos ba Povu nu’udar Prezidente Repúblika. Liafuan ne’ebé sei hasae atu manán konfiansa Povu nian tenke halo ho maturidade polítika no seriedade, nu’udar ezemplu di’ak atu sidadaun hothotu no jerasaun foin-sae bele banati tuir iha eleisaun sira tuir mai”, dehan kandidatu Francisco Guterres Lú Olo liu husi konferensia imprensa neebé mak lee sai husi representante legal ekipa susesu Fernando Gusmão iha hotel luz Clarita kinta 24/03/2022.
Tuir Kandidatu ne’e katak, Timor-Leste presiza nafatin Presidente Repúblika ida ba períodu 2022 to’o 2027.
Nu’udar kandidatu ba Prezidente Repúblika, ha’u husu deskulpa karik ha’u ka ha’u-nia apoiante ruma ofende ema ruma iha kampaña hala’o husi 2 marsu to’o 16 marsu 2022,” dehan Lú Olo.
Iha parte seluk Kandidatu Francisco Guterres Lú Olo parte fó obrigadu barak ba esforsu tomak husi TR ba prosesu verifikasaun kandidatura, husi STAE no CNE, no ema hotu ne’ebé partisipa iha prosesu eleitorál, fiskais, observadores internasionais, agradese mós ba PNTL ne’ebé mantein ordem di’ak iha teritóriu tomak.
Husi ha’u nia parte, ha’u fó obrigadu barak ba esforsu tomak husi Tribunal Rekursu ba prosesu verifikasaun kandidatura, husi órgauns eleitorais, STAE no CNE, no mós husi ema hotu ne’ebé partisipa iha prosesu eleitorál hanesan fiskais no observadores internasionais. Agradese mós ba PNTL ne’ebé mantein ordem diak iha teritóriu tomak”.
Jornalista : Rita Moniz
Editór : Agapito de Deus
