Lafaek News- Segundu Sarjentu Manuel João Babtista Aparício “Manekas” ohin ofisiálmente rezigna aan hosi FALINTIL-Forsa Defeza Timor Lorosa’e (F-FDTL) Unidade Polisia Militar, hodi ba fali vida sívil.
Komandante Unidade Polísia Militár Majór Abel da Costa “Niki” afirma Segundu Sarjentu Manuel João Baptista Aparício, durante hala’o knaar hanesan militár servisu di’ak tebes ho didika aan tomak ba instituisaun refere, maibé tanba desizaun privadu, hanesan komandante respeito ida ne’e, maibé parte ida sente triste tanba lakon membru di’ak ida.
“Ninia dedikasaun servisu kapas, tanba ne’e ha’u triste bainhira nia hakarak sai hosi militár, liuliu hosi Unidade Polísia Militár ba fali vida politika,” Komandante Unidade PM Abel ba jornalista iha kuartél jerál PM Kintal Bo’ot-Dili, sesta (11/12).
Komandante unidade PM reforsa, segundu sarjentu, Manuel João Baptista Aparício, hanesan ema ne’ebé ativu dezde funu laran nu’udar forsa FALINTIL, no bainhira restaura independénsia nafatin ativu hodi involve direita ba harii F-FDTL.
“Ha’u nia membru ne’e la’ós foin mak aproveita (foin tama F-FDTL), maibé nia hahú kedas hosi inísiu, hanesan mós fundadór FALINTIL-Forsa Defeza Timor Lorosa’e (F-FDTL). Tanba ami hamutuk maka harii (FDTL) la’ós nia mai aproveita de’it,” nia subliña
Alende ne’e sorin ida, segundu sarjentu Manuel João Baptista Aparício, relata komandu la hasai maibé nia rasik mak deside sai tanba daudaun ne’e involve ona aan iha partidu polítiku Os Verdes nu’udar Vise Prezidente.
“Ha’u rasik deside sai hosi PM, tanba situasaun balun obriga. La’ós komandu F-FDTL mak haruka ha’u sai, maibé ida ne’e ha’u nia inisiativa rasik,” afirma nia
Entretantu durante ne’e membru ativu hosi unidade polísia militár hamutuk 158, maibé hafoin segundu sarjentu Manuel João Baptista Aparício deside rezigna aan, total membru agora hela de’it 157.
Jornalista : Orlando Magno
Editór : Ezequias Tomás
