Lafaek News—Sisto Borges idade 27, suku Lisapaat, postu administrativu Hatulia, munisípiu Ermera, tuir teste Austrália iha etapa 2018, pasa ona husi teste fíziku, ikus mai la hetan oportunidade ba servisu Austrália.
Sisto nia orijen husi aldeia Galelo, suku Lisapat, postu administrativu Hatulia B, munisípiu Ermera, hala’o hela nia estudu iha Universidade da Paz, fakuldade direitu, ba da-daun para hela eskola, tanba hakarak ba Austrália iha 2018, liu ona teste hodi hein de’it kontaktu husi SEFOPE atu servisu iha Austrália (SWP), maibé hein too agora seidauk kontaktu.
Ho nia pasiénsia hodi hein dezde 2018 too ohin 2023, laiha kontaktu, Sisto halo negosiu kiik hodi selu nia alin sira nia eskola hodi hein kontaktu husi SEFOPE.
Sisto faan haknauk supermie, aqua kuarter, sigaru, pop-mie, kafe no abc moka, faan komesa husi loron segunda too sesta hetan dolar 15, sábadu ho domingu hetan dolar 30 too 40, nune’e hodi hein kontaktu husi SEFOPE, hakarak hatene, atividade negosiu kiik ne’e nia lori ninia osan rasik no rendimentu ne’ebé hetan kada loron sustenta moris loro-loron inklui selu fali nia alin nain rua ninia eskola ensinu pre-sekundaria no ida fali tuir hela kursu balun iha Dili.
“Ha’u nia laran ne’e triste, tanba vaga ida Austrália ne’e ami barak mak kompete depois kolega barak mak passa iha ne’eba, hau nia kolega sira ne’e konsege ba hotu ona Austrália iha 2018, maibé too agora ami seidauk ba komesa 2018 too ohin 2023 ona,” Sisto reklama ba lafaek news iha Tasi-Tolu foin lalais ne’e.
Sisto triste tanba saida SEFOPE seidauk kontaktu nia too ohin loron, nia ezije ho razaun pasa kedan husi selesaun dokumentu no teste fíziku, nia maluk sira ne’ebé tuir teste hamutuk ba hotu ona no balun fila tiha ona mai Timor, maibé Sisto hein too lakon esperansa.
“Ha’u senti triste tanba ema seluk bele ba ona, tanba sá ha’u seidauk, tan ne’e mak ha’u triste, maibé ha’u seidauk lakon konfiansa tanba vaga Australia kuando ami pasa ona entaun naran iha sistema la lakon,” nia espresa.
Iha entrevista ne’e, Sisto mos hatoo lia-menon ba nia maluk joven sira katak tempu agora atu buka matenek no buka osan, la’os buka arte marsial ho arte ritual folin laiha ona, lian Indonézia katak sekarang tidak zaman lagi, tempu agora atu buka matenek no buka osan hodi hadia moris.
“Tempu ida agora mak treinu kakutak signifika katak buka matenek atu aban bainrua labele basa rentos, más buat hotu liu ona, entaun di’ak liu aproveita eskola, tanba eskola hanesan mos treinu ida para aban-bainrua bele tuun joga iha kampu servisu, se la’e aban-bainrua, ema seluk mak joga iha kampu servisu, ita tuur hodi hateke de’it (sai fali penontong), tanba la aproveita oportunidade ida agora ne’e,” katak Sisto ba lafaek news iha nia fatin negósiu Tasi-Tolu foin lalais.
Kona-ba ezijénsia Sisto nian, redasaun lafaek news tenta konfirma ho Sentru Formasaun SEFOPE Bekora, maibé director ezekutivu laiha fatin tanba ho asuntu servisu iha rai liur.
Jornalista : Arnaldo Nunes
Editor : Agapito de Deus
