Lafaek News—Ohin loron Domingu (03/10/2021), Ekipa Fc Lagoa II susesu halakon Fc Bessi Mean Pasadu ho festa golu 1-0 iha taça rotativa Juventude Luta Hamutuk ba Futuru Saúde Timor Leste (JLHFS-TL) no Juventude Prevene Seksu Livre no Abortus (JUPSELA) Cup ne’ebé hala’o iha kampo João Paullo II Tasi-tolu Dili.
Iha jogu primeira parte minutu 25 Fc Bessimean Pasadu hetan oportunidade penalidade ne’ebé suta husi jogadór Juvito Soares (8) maibé failla tanba la konsege aproveita oportunidade ne’e ho di’ak.
Maske Fc Bessimean kbi’it latoo atu aguenta ho Fc Lagoa II, maibé ekipa ne’e nafatin tenta halo presaun, iha esforsu hirak ne’e la konsege fó biban atu marka golu ba guarda rede Lagoa II.
Oportunidade vitória monu ba Lagoa II nia liman iha minutu 30 liu husi jogadór Rano (7) ne’ebé ba dahuluk lees guarda rede Bessimean Pasadu 1-0.
Jogu komesa manas liu tan tanba Fc Danau II hetan oportunidade barak liu ho halo presaun, halo mós jogadór Bessimean iis halai sala iha kampo laran.
Husi golu ida ne’e mak termina iha minutu primeira parte, laiha tan golu ruma mak akontese no vitória provizória hela ba Lagoa II ne’ebé ukun ho score 1-0.
Hakur ba segundu parte ekipa rua nafatin halo presaun ba malu. Fc Bessimean halo mudansa ba tékniku jogu no estratéjia jogu, maibé mudansa hirak ne’e hela de’it ho mudansa tanba la rezulta golu ruma.
Entretantu jogu refere organiza husi komisaun organizadór bairo João Paullo ll ne’ebé lidera husi Joanico Sebastião da Costa no hetan suporta husi Juventude Luta Hamutuk ba Futuru Saúde Timor Leste (JLHFS-TL) no Juventude Prevene Seksu Livre no Abortus (JUPSELA).
Jornalista : Juvita dos Santos
Asisten Editór : Pedro de Almeida
