Lafaek News–Vascolao Meta orijen idade 25 husi aldeia Falowai suku Leohitu postu administrativu Balibo, munisipiu Bobonaru, rezidénsia atual hela iha aldeia moris foun suku Komoro Dili, moris iha situasaun ekonomia difisil, kondisaun at no krize aihan uma laran.
Vascolao iha oan nain lima hamutuk mane rua ho feto tolu, maibé labarik sira moris iha situasaun presaun ekonomia, tanba inan-aman laiha kbiit atu responde ezijénsia oan nain lima nian atu hela iha fatin dignu no proteze duni labarik sira nia direitu.
Hahú husi tinan 2016 to’o agora ha’u nafatin servisu mak suru rai henek , no pinheira rai henek durante tinan 5, maibé la baruk mai ha’u tanba husi servisu ne’e mak bele sustenta nesesidade uma laran nia,tanba dala barak labarik sira ba halimar ho nia kolega sira seluk ne’ebé han hela dose ka rebisadu ruma sira fila mai uma tanis, hirus hakarak atu han hanesan ho kolega sira seluk ami tenke sosa hodi fo ba labarik sira, tanba sira la hatene servisu ne’ebé ha’u halo ne’e todan tebes mai ha’u,’’”Hateten Vascolao Meta ba Lafaek News iha servisu fatin mota laran, aldeia Moris foun suku Komoro postu Dom Aleixo foin lalais ne’e.
Servisu ne’ebé Vascolao halo todan, hamrik iha loron manas nia laran durante oras 3 ka 4, hodi pineira rai-henek, tanba rai-henek de’it mak nu’udar baze fundamentu importante hodi suporta mesesidade uma loro-loron, maske ema ladun sosa, maibé kontinua pineira hodi hein ema sosa.
Ha’u hakarak tebes halo uma atu ho família sira hela nune’e tempu udan ka inundasaun ne’ebé akontese fulan kotuk liu ba karik ami mós iha netik ona uma metin ida atu hela ba, maibé osan la too atu hadia uma diak,’’ katak kbiit laek ne’e.
Vascolao esplika esperiénsia moris iha uma kain ne’ebé nia lidera, difisil tebes husi osan, mehi atu hadia kondisaun uma di’ak nune’e bele proteze labarik nain lima husi inundasaun (laluburu) ne’ebé sei akontese tuir alerta husi meterolojia iha fulan ida ka rua mai oin.
Ha’u sente triste tebes tanba kondisaun uma la di’ak , menus husi hahán uma laran, ba labarik sira mós agora dadaun eskola iha nivel pre-primaria de’it ha’u sente labele atu haree kontinua tan ba labarik sira nia estudu sa’e tan ba iha nivel pre-sekundaria nia, tan hanoin ba uma nia kondisaun ne’ebé didin hela ho kalen aat sira no ba hahán loron kalan nia, ha’u nia oan feto primeiru agora klasse 5, mane segundu foin klasse 2, nia alin sira ne’e seidauk eskola,’’ nia dehan.
Vascolao dehan, krize finanseiru ne’ebé nia hasoru, nia dehan nain rua de’it sei eskola iha pre-primaria, sente iis la too tiha ona, sa tan nain tolu ne’e eskola hotu, foti osan husi ne’ebé atu selu netik sira nia eskola atu hadia sira futuru.
Foin nain rua de’it mak eskola ha’u sente todan ona, tanba presiza ona lapis, lapijeira, lapis koor, no presiza ba hatais sira ne’e ha’u sente labele ona , tanba nia servisu iha de’it mota laran susar tebes atu hetan osan, dala ruma semana ida hotu mak foin ema mai sosa ret 1, maibé ret 1 ne’e mós dólar 15$ de’it atu sustenta nesesidade uma laran, maibe la to’o.
Atu remata, kbiit laek ne’e husu ba nain ulun sira atu hadia povu nia moris, ne’ebé tinan barak ona moris nafatin iha mota laran , labele hanoin de’it ba sira (governu) nia moris ne’ebé di’ak ona hodi haluhan tiha povu kiik sira ne’ebé terus ba ai-han no hela fatin la dignu, tempu udan moris sente la hakmatek.
Estajiada : Juvita Ximenes
Editór : Agapito de Deus
