Lafaek News—Jogu kontinuasaun kuatru finál Taxa 12 Novembru ne’ebé realiza iha Estádiu Munisipál Dili, entre ekípa jigante foho tutun AD SLB Laulara kontra ekípa DIT FC, termina ho sorti monu ba SLB ho score 3-1.
Jogu iha minútu dahuluk, ekípa rua hahú jogu ho ritmu ne’ebé lais, tanba idak-idak hakarak sai kampiun hodi hakat ba faze tuir mai, hodi hasoru Lalenok United FC, ne’ebé iha loron primeiru (sábadu 07-12) konsege manan ekípa Boavista FC.
Tanba ne’e, ekípa rua esforsu aan tebes iha jogu refere. Maibé iha jogu minútu 45 dahuluk, forsa ekípa rua hanesan tanba tenki termina primeira parte ho score 1-1.
Golu hosi AD SLB Laulara hatama hosi jogadór Zenovio Mota, ho númeru kamizola (17) iha minutu 28. Ekípa DIT FC la presiza hein kle’ur hodi resposta kedas golu ba redé SLB tanba iha minutu 34 liuhosi jogadór Venseslau Fátima ho númeru kamizola (22) hatama golu resposta ba rede SLB Laulara, nune’e obriga ekípa rua ne’e tenki rekoñese forsa hanesan iha primeira parte.
Maski ekípa DIT FC ho esforsu tomak obriga iha primeira parte tenki empata, maibé ida ne’e la hamate espíritu kampiaun ne’ebé kuda iha jogadór SLB Laulara nia fuan.
Tanba ho espíritu kampiaun ne’ebé iha hatudu duni ho rezultadu pozitivu hodi anima adeptu liuliu Football Lovers foho tutun Laulara liuhosi golu rua ne’ebé hatama iha segunda parte liuhosi jogadór Mouzinho de Lima ho númeru kamizola (10) iha minutu 72 no mós liuhosi jogadór João Pedro ho númeru kamizola (7) iha minutu 81.
Ho rezultadu ikus hosi jogu iha domingu lorokraik ida ne’e, maka ekípa jigante foho tutun AD SLB Laulara iha direitu tomak hakat ba faze finál, hodi hasoru jigante sidade Dili Lalenok United FC iha loron sábadu 12-12-2020.
Jornalista : Rosa Fernandes
Editór : Ezequias Tomás
