Lafaek News—Sentru Nasionál Chega (CNC), hala’o lansamentu ba monumentu “Memoriál 7 Dezembru 1975” ho objetivu fó hanoin hikas ba jerasaun foun sira kona-ba eroi no eroina sira nia dedikasaun ho aten brandi hasoru forsa invazór Indonézia iha altura ne’ebá.
7 Dezembru 1975 sai hanesan istória moruk ba rai no povu doben ida ne’e, tanba iha loron ida ne’e maka forsa ilegál Indonézia invade rai doben hodi oho as’wain feto no mane hamutuk ho ninia povu doben sira.
Hafoin liu tiha tinan 45 iha duni fatin ida ne’e, fatin ida ne’ebé ita nia as’wain sira hetan kaptura no oho hosi inimigu, hamarik ona monumentu ida ne’ebé fó hanoin hikas ba jerasaun foun sira, katak hosi fatin ida ne’e, hanesan mós fatin istóriku seluk iha territóriu laran tomak, forsa invazór sira komesa tama hodi oho povu doben Timor Lorosa’e.
“Sentru Chega agradese ba prezidente repúblika Fransisco Guterres Lu-Olo, hatan ba inisíativa sentru chega nia iha kedas 2018 hodi hanaran fatin ne’e “Memoriál 7 de Dezembru 1975″ ,” Diretor Ezékutivu CNC Húgo Maria Fernandes, deklara iha ámbitu lansamentu memoriál iha Portu Dili, segunda (07/12).
Nia hatutan, iha fatin ida ne’e sai sasin lian la’ek ba as’wain sira mak hanesan saudoza Isabel Barreto espoza hosi saudozu Prezidente Repúblika Nicolau dos Reis Lobato, saudoza Roza Muki Bonaparte, saudozu Francisco Borja da Costa, jornalista Aústalianu Roger East, Bimba aliás Namuk, saudoza Epifánia Maria da Silva, no martires sira seluk ne’ebé hetan oho hosi forsa invazór.
Dehan nia, memoriál 7 Dezembru 1975, fó hanoin hikas ba Timoroan hotu kona-ba aktu forsa Indonézia, aktu violénsia violasaun direitu umanu ne’ebé akontese iha momentu ne’ebá hodi halakon as’wain no povu wain ba wain nia vida iha períodu 7-8 Dezembru 1975. Nune’e Timoroan hotu iha dever no direitu
Hodi fó onra, fó rekoñesimentu no dignifika ba martir hodi hanoin nafatin sira iha ita nia moris tomak.
Entretantu tuir observasaun jornalista LafaekNews iha terenu nota katak, seremónia refere hetan partisipasaun hosi reprezentante Prezidente Repúblika, Francisco Guterres Lu Olo, membru oitavu governu, estudante sekundáriu no mós Universitáriu inklui sobrevivente polítiku hosi konflitu antigu 1975 to’o 1999.
Jornalista : Rita Moniz
Editor : Ezequias Tomás
