Lafaek News—Vise Xefe Administrasaun Fundacão Centro Quesadhip Ruak (FSQR), Mardoqueu Soares hatete, fundasaun komprometidu fó apoiu permanente ba família kbiit laek lima tanba haree hosi idade ne’ebé avansadu liu no defisiénte grave.
“Família kbiit laek ida hosi Hera mak avó Maria no Simão ho idade 70 ba leten, ida hosi Kaikoli avó Martinho, hosi Kakaulido avó Carlota, hosi Bidau Masan avó Florentina dos Santos ho idade 72 no ikus mak defisiente Domingas Nunes ho idade 30 hosi suku Metiaut aldea Tres,” dehan Vice Xefe Administrasaun, Fundacão Centro Quesadhip Ruak, Mardoqueu Soares iha nia knaar fatin Taibesi, Kuarta (23/06/2021)
Nia salienta, família kbiit laek nain lima ne’e konsidera hanesan família ba fundasaun ona tanba hanesan responsabilidade ida ba fundasaun atu kada fulan obrigatóriu ba fahe nesesidade báziku ba sira.
“Apoiu ne’ebé FCQR oferese mak nesesidade báziku hanesan foos, mina, supermi no seluk tan aloka kada fulan maibé iha tempu estadu emerjensia so bele aloka fulan tolu dala ida,” informa nia
Apoiu anterior ne’e fundasaun apoiu rehabilitasaun uma, no iha balun ne’ebé konstrui uma foun ho intensaun atu dignifika família lima ne’ebé kompostu hosi idade avansadu ona no defisiensia grave atu bele hamahan an hodi aguenta moris.
Fundacão la’os fó apoiu de’it ba família lima ne’e maibé fó mós apoiu ba orfonatu sira hanesan iha orfonatu Comunidade Cristo de Betâniea Culau, Kanosiana Bidau, Kanosiana Balide no Madre Dominicana maibé apoiu ne’e la’os permanente no sei akontese de’it se bainhira fundasaun hetan apoiu barak hosi doadór sira.
“Da-daun ne’e fundasaun fó apoiu foka ba iha kapitál Dili no iha planu atu alarga tan, maibé alende ne’e, fundasaun fó mós apoiu ba orfonatu madre karidade iha munisípiu Aileu no orfonatu Aidahaleu iha munisípiu manufahi postu administrativu Same,” esklarese nia
Nia hakotu, Fundacão Centro Quesadhip Ruak (FCQR), durante ne’e hetan apoiu hosi komunidade Sineza, HAKKA fundation, Pertamina, Telecomsel, Perisos, embaixada Autralia, embaixada Indonézia, embaixada Korea, embaixada Japan no seluk tan.
Iha sorin seluk, avó Maria ne’ebé mós hanesan benefisiariu ho kontente agradese ba apoiu no vizita ne’e tanba durante pandemia la iha ema ida mak ba vizita nia. Buat ne’ebé dífisil ba sira, iha momentu ne’e mak osan no modo.
“Ha’u reja nafatin ba Sra. Isabela no Sr. Taur atu Maromak proteze no ajuda nafatin sira iha sira nia servisu. Bainhira ha’u hanoin sira ha’u nia matan we’en tun,” dehan nia
Tuir observasaun lafaek news, família kbiit laek hirak ne’e ho kondisaun fíziku la forte ona no merese atu hetan atensaun hosi ema ruma, hanesan avó Maria ho Simão ho idade ne’ebé avansadu liu akresenta avó Simão ne’ebé ho defisiénte matan, sira la bele halo ona servisu ne’ebé todan ka buka osan rasik tanba kbiit ne’ebé Maromak fó komesa tun ba da-daun.
Jornalista : Felisberto Fernandes
Editor : Agapito de Deus
