Lafaek News—Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, CIGC-SS), Rui Maria de Araújo, informa pasiente pozitivu Covid-19 ida iha sala izolamentu kategoria moderadu no sofre krónika kondisaun estável.
“Husi kazu ativu ne’ebé iha izolamentu, iha ida ne’ebé tama kategoria moderadu, kazu ida ne’e sofre insufisiensia renal kronika, no halo hemodiálize durante tinan rua ona, kazu ida ne’e detetadu pozitivu loron rua liu-bá,” dehan Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, CIGC-SS), Rui Maria de Araújo, iha CCD, Domingo, (21/03/2021).
Nia dehan horikalan iha sala izolamentu Tasi-Tolu, nia iha problema oksijenasaun, no ekipa médika izolamentu nian deside transfere ba Vera- Kruz nu’udar fatin ne’ebé preparadu atu halo izolamentu ba kazu moderadu sira. To’o loriak ne’e ninia kondisaun estável,” tenik nia.
Nia dehan, nia kontinua halo tratamentu ba hipertensaun no aban ninia oráriu atu halo hemodiálize iha HNGV, ne’ebé prepara ona fatin espesiál ba halo hemodiálize ba ema sira ne’ebé mós pozitivu SARS-CoV-2.
Portavos ne’e hatete, iha mós kazu ida, inan isin-rua, idade tinan 27, horiseik iha hemorajia, ka fakar-ran.
“Señora ida ne’e iha istória abortu, ho ida ne’e dala rua ona. Horikalan ekipa médika transfere ba Vera Cruz hodi halo intervesaun husi espesialista sira. Oras ne’e dadaun kondisaun estável, no sei transfere hikas ba izolamentu Tasitolu,” hatete Rui.
Jornalista : Sandi Belo
Asisten Editór : Pedro de Almeida
