Lafaek News—Ministériu Saúde (MS) liu husi sentru integradu jestaun krije (SIJK) relata, kazu positivu Covid-19 foun ohin (21/03) hamutuk nain 55 nain 26 máka husi aldeia 20 de setembro, suku bebonuk, rekuperadu nain 3 no kazu ativu 206.
“Ohin kazu foun 55, nain 43 iha munisípiu Dili, nain 11 husi munisípiu Baukau, nain 1 husi Munisípiu Vikeke, rekuperadu nain 3, kazu ativu 206,” dehan Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, CIGC-SS), Rui Maria de Araújo, iha CCD, Domingo, (21/03/2021).
Portavoz ne’e esplika, husi kazu hirak ne’e, iha mane nain 23, feto nain 32, ema ho idade husi 0-14 nain 13, no ema ho idade entre tinan 16-67 nain 42, ema sintomátiku nain 9 no asintomátiku 46.
Husi kazu positivu ohin, iha Munisipiu Dili iha kazu foun 43, kazu pozitivu 1, hela iha Aldeia Berbidu, Suku Becora, Posto Administrativu Cristo Rei. Pozitivu ida ne’e kontaktu-besik ho kazu konfirmadu iha cluster HNGV.
Nia hatutan, Pozitivu hirak ne’ebé kontaktu-besik ho kazu iha cluster hanesan, ne’ebé anunsía horiseik, dia 20 de Marsu 2021.
“Kazu pozitivu 9, hela iha Aldeia Bidau Tokobaru 2, Suku Kulu-hun, Postu Administrativu Kristu-Rei, kazu pozitivu 26, hela iha Aldeia 20 de Setembro, Suku Bebonuk, Postu Administrativu Dom Aleixo, kazu pozitivu 7, hela iha Aldeia Grilos, Suku Gricenfor, Postu Administrativu Nain Feto,” tenik portavoz.
Iha Munisípiu Baukau, ohin iha kazu foun 11. Kazu foun hirak ne’e, hela iha Aldeia Builai, Suku Buibau, Baucau Vila. Kazu konfirmadu hirak kontaktu-besik ho kazu husi Aldeia Lamegua ne’ebé anunsia iha dia 19 de Marsu.
Aleinde, iha Munisípiu Vikeke, ohin iha kazu foun 1, kazu foun ida ne’e, hela iha Aldeia Mamaluk (Beloi), Suku Karaubalu, Viqueque. Kazu konfirmadu ida ne’e kontaktu-besik ho profisionál saúde ne’ebé halo kursu pós-laboral iha UNTL, fila husi Dili ba Viqueque iha dia 8 de Março.
Ikus liu apela ba populasaun ne’ebé saí husi Dili ba munisipiu sira seluk, entre dia 5 to’o dia 9 de Marsu madrugada, molok serka sanitaria hahú tama iha vigor iha Dili, atu favor ida aprezenta-an ba autoridade saúde sira ne’ebé besik-liu, iha imi nia hela fatin, hodi bele hetan atendimentu.
Jornalista : Sandi Belo
Asisten Editór : Pedro de Almeida
