Lafaek News— Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, SIJK-SS), Rui Maria de Araújo, husu populasaun hotu iha Territóriu katak bainhira sente isin manas tenke hakbesik lalais ba sentru saúde sira hodi bele hetan atendimentu.
“Nune’e nafatin apela ba populasaun iha Munisípiu Dili no mós munisípiu sira seluk katak bainhira sente isin manas, kakorok moras, inus-ben, mear, favor hakat ba Sentru Saúde ne’ebé besik-liu atu bele hetan atendimentu,” Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, CIGC-SS), Rui Maria de Araújo, husi kompriensa inprensa CCD, Tersa, (23/03/2021).
Tuir dadus husi Sentru integradu Jestaun Krize-Sala Situasaun (SIJK-SS), tersa (23/03/21), rejista kazu positivu Covid-19 foun ne’ebé hamutuk 16 husi munisípiu Dili hamuuk 14 no Vikeke na’in 2, nune’e no kazu ativu sa’e ba 227.
Nia hatutan, husi kazu foun nain 16 ne’e kompostu husi mane nain 6, feto nain 10, ema sintomátiku nain 4, asintomátiku nain 12, no husi horiseik mai ohin hamutuk hotu halo 689 testes PCR.
Munisípiu Dili iha kazu foun 14, Kazu pozitivu 3, hela iha aldeia Bidau Toko-baru 2, Suku Kulu-hun, Postu Administrativu Cristo-Rei, no Kazu pozitivu 9, hela iha Aldeia 20 de Setembro, Suku Bebonuk, Postu Administrativu Dom Aleixo, Pozitivu hirak ne’e kontaktu-besik ho kazu iha cluster hanesan, ne’ebé anunsía horiseik.
Kazu pozitivu 1, hela iha Aldeia Kakeu-laran, Suku Becora, Posto Administrativu Cristo-Rei. Pozitivu ida ne’e detetadu iha vijilánsia sentinela iha HNGV. Ekipa sira sei buka-tuir ninia ligasaun ho cluster sira seluk.
Kazu pozitivu 1, hela iha Aldeia Mota-klaran, Suku Bidau, Posto Administrativu Cristo-Rei. Pozitivu ida ne’e detetadu iha MTCI. Ekipa sira sei buka-tuir ninia ligasaun ho cluster sira seluk.
Nune’e mós iha Munisipiu Vikeke, ohin iha kazu foun 2, kazu foun hirak ne’e, hela iha Aldeia Umaneiku, Suku Ossu de Cima, Postu Administrativu Ossu, kazu konfirmadu hirak ne’e kontaktu-besik ho kazu ne’ebé deteta iha fatin hanesan.
Jornalista : Sandi Belo
Asisten Editór : Pedro de Almeida
