Lafaek News—Sekretáriu Estadu Komunikasaun Sosiál (SEKOMS), Merício Juvinal dos Reis “AKARA”, hala’o enkontru ho Vise-Ministru Interior, Antonio Armindo, ho objetivu kombate informasaun falsu (hoax) iha Timor Leste.
“Iha enkontru ne’e, atu koordena servisu oinsá tau ideia no esforsu hamutuk hodi kombate HOAX iha Timor Leste, tanba agora ema lansa informasaun HOAX aumenta makas liu husi media sosiál relasiona ho kazu COVID-19,” SEKOMS Akara, ba jornalista iha sala reuniaun Ministériu Interior, Vila-Verde, Dili segunda, (22/03/2021).
Iha enkontru ne’e, Mericio afirma SEKOM sei ko’alia mos ho media sira hodi ajuda públiku oinsá prepara sidadaun sira atu uza Plataforma online ho pozitivu, responsabilidade no sivilizadu.
Iha fatin hanesan, Vise-Ministru Interior Antonio Armindo informa, iha nia parte fó apresiasaun ba SEKOMS ne’ebé esforsu makas hodi servisu ho entidades tomak ba kombate HOAX.
“Koordenasaun servisu ne’e importante tanba nee parte Ministériu Interior prontu kolabora hamutuk ho PNTL hodi identifika no evita HOAX ne’ebé espalla iha komunidade nia leet,” VMI Antonio dehan.
Jornalista : Orlando Magno
Editora : Nelya Barros
