Lautém-(Lafaek News)—Realsiona ho joven mane ida ho idade 23 iha aldeia Reisoru suku Home postu administrativu Lospalos vila pozitivu Covid-19, administradór Munisípiu Lautém Domingos Savio, hatun desapasu ofisial ho númeru 08/ A.M.Lautem/III/2021, liu husi enkontru konjunta hodi hakotu suspende atividade hotu hahú husi loron kuarta 23/03/2021 too 29 Marsu 2021.
Iha komunikadu imprensa ne’ebé lafaek news asesu iha tersa (23/03/2021), sita iha despaixu refere asina husi administradór Munisípiu Lautém Domingos Savio, katak atividade prosesu aprendizajen, kultura kompostu husi lia mate lia moris inklui jogu manufutun sei taka provizóriu. Despaixu ne’e mós sita suspende populasaun Lautém tama sai husi suku Home too loron 29 Marsu, bandu mós Timor-oan ema ba vizita fatin turístiku sira, ema hotu tenke uza maskara, distánsia fíziku no fase liman bei-beik.
Entretantu observasaun lafaek news nota katak komunidade sira iha Lospalos vila kontinua kumpre regras protokolu Ministeriu Saúde nian hodi uza maskara kada loron iha munisípiu Lautém.
Jornalista : CE.Lautem
Editora : Nelya Barros
