Lafaek News—Ministériu Saúde rejista sidadaun na’in tolu (3) mate tan ho Covid-19, husi inisiu to’o ohin loron total obitu/mate hamutuk ona 62, iha ne’ebé kazu ativu sa’e ba 4.554.
Tuir Koordenadór forsas tarefas ba prevensaun no mitigasaun surtu covid-19, Rui Maria de Araújo, liu husi komunikadu imprensa ne’ebé lafaek news asesu ohin loron 29/08/2021, total óbitu ne’ebé relata ohin ema nain 3 (tolu).
“Mane, idade 70, Timoroan, hela iha Dili, vasina seidauk kompletu, iha 20 Agostu 2021 diagnóstikadu iha HNGV ho sindroma insufisiénsia respiratória aguda (SIRA) tan bá Covid-19 no iha loron ne’e kedas matebian hala’o tratamento iha Lahane tuir protokolu ne’ebé iha, Matebian i’is-kotu horikalan 20h20, tan bá respiratorio failure/parajen respiratória,” dehan Koordenadór surtu covid-19, Rui Maria de Araújo informa, domingu (29/08/2021).
Nune’e mós Mane, idade 89, Timoroan, hela iha Dili, seidauk vasina, iha 22 Agostu 2021 diagnóstikadu iha HNGV ho sindroma insufisiénsia respiratória aguda (SIRA) tan ba Covid-19, iha loron ne’e kedas matebian hala’o tratamento iha Vera Cruz tuir protokolu ne’ebé iha, no Matebian i’is kotu horikalan 22h30, tan bá respiratoric failure/parajen respiratória.
Iha mós Mane, idade 72, Timoroan, hela iha Maliana, seidauk vasina, iha 27 Agostu 2021 diagnóstikadu iha Maliana ho sindroma insufisiénsia respiratória aguda (SIRA) tan ba Covid-19, Matebian sofre mós moras kankro próstata ho metastaze ba orgaun seluk iha isin, iha loron ne’e kedas matebian hala’o izolamentu iha Maliana, no Matebian i’is-kotu horikalan 19h00, tan bá multiple organ faiure/falénsia orgaun barak.
Enkuantu familia husi matebian nain 3 kordena hela ho ekipa saúde atu hala’o funeral tuir protokolu ne’ebé adopta iha Timor-leste.
Alende ne’e iha loron 29 Agostu 2021, izolamentu Vera Kruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu nain 121, ho detallu hanesan; Grave hamutuk 24 pessoas (nain 2 uza ventilador, nain 3 uza CPAP-Continuous Positive Airway Pressure-19 uza oksijéniu), Moderado hamutuk 66 pessoas, Leve hamutuk 31 pessoas.
“Kazu detetatu foun ne’ebé relata iha loron 29 Agostu 2021: 166 (iha Dili 119, Aileu 13, Baukau 8, Bobonaro 1, Kovalima 2, Ermera 5, Manatutu 1, Vikeke 17, Kazu rekuperadu ohin hamutuk: 132, kazu ativu ohin hamutuk :4.554, no total kazu konfirmadu kumulativu iha 29 de Agostu 2021 (sura husi 21 Marsu 2020): 16.402,” relata husi Koordenadór.
Jornalista : Sandi Belo
Asisten Editór : Pedro de Almeida
