Lafaek News- Hafoin akontese udan boot iha loron kuarta hamosu inundasaun rezulta uma kain iha postu administrative 2 iha munisípiu Dili mak afeta makas ba akontesimentu, Sekretáriu Estadu Protesaun Sivíl (SEPS) foti kedas asaun rapidamente hodi evakua no fó ajuda umanitária ba família ne’ebé sofre ba dezastre ne’e.
Udan ne’ebé foin lalais akontese loron rua tuituir malu rezulta uma kain 30 kompostu hosi uma kain 16 iha postu administrative Vera Cruz iha aldeia Terus Na’in no iha postu administrative Kristu Rei uma kain 14 iha suku Kamea mak afeta ba akontesimentu ne’e.
Sekretáriu Estadu Protesaun Sivíl, Joaquin José Gusmão, hatete ho situasaun refere nia parte foti kedas asaun hodi evakua vítima sira ba fatin seguru no halo kedas apoiu umanitária ba família afetadu.
Apoiu ne’ebé hosi parte SEPS apoiu ne’e maka fasilidade uma kain (Bikan, Tasu, Kanuru, inklui Lona no Moskiteiru).
Dehan nia, governu foti asaun hodi apoiu família afetadu sira tanba ne’e papél governu nian liuliu diresaun ne’ebé nia lidera.
“Ita nia vítima sira iha aldeia Terus Na’in ita la halo evakuasaun tanba fatin ne’ebé sira hela ba sei bele hela tanba ne’e ita apoiu mak sasán sira (fasilidade uma kain no ai han), maibé iha Kamea ita halo evakuasaun uma kain tolu (tanba Bee tama uma) sira ba iha nia família depois ita apoiu kedas,” SEPS Joaquin ba jornalista iha Aldeia Terus Na’in Dili, Sesta (08/01).
Informa nia, alende governu rasik fó apoiu, iha mós hosi parseiru sira ne’ebé durante ne’e iha kooperasaun di’ak ho governu fó mós tulun atravesa hosi SEPS hodi tulun vítima sira bainhira mosu situasaun hanesan ne’e.
“Ita mós hetan apoiu husi parseiru sira hanesan WFP, CVTL no parseiru seluk sempre ajuda ita bainhira mosu inundasaun,” nia dehan
Entretantu iha fatin hanesan vítima inundasaun aldeia Terus Na’in, Tomásia da Costa Barros hatete, nia parte sente kontente bainhira governu la taka matan ba sira maibé iha parte balun nia sente triste boot tanba kauza hosi bee tama uma tanba drenajen la iha ho nune’e bee la halai tuir ninia dalan.
“Ami sente kontente uitoan bainhira governu ajuda ami, maibé ha’u nia tristeza mak barak liu tanba bee boot sobu hotu fatuk sira iha uma oin entaun bee tama liu uma laran, tanba ne’e ami husu ba governu atu hadi’a bee dalan ida ba ami nune’e bainhira udan, bee la’o de’it tuir dalan,” deklara nia
Jornalista: Orlando Magno
Editór : Ezequias Tomás
