Lafaek News-Sekretáriu Estadu Protesaun Sivíl (SEPS), Diresaun Nasionál Prevensaun Konflitu Komunitária (DNPKK), hala’o diálogu ho juventude grupu arte marsiais no arte ritual hamutuk lima iha munisipíu Aileu postu administrativu Aileu Villa, Suku Seloi Kraik, ho tema ‘prevensaun konflitu komunitária kria paz no estabilidade iha rai laran.
Diretur Jerál Protesaun Sivíl, Ismael Babo, agradese wa’in ba maun sira ne’ebé toma responsabilidade ba arte marsiais no arte ritual sira no arte kultura, ohin ha’u hakarak konvida maun alin sira, hateke itoan ba kotuk arte marsiais nia kontribusaun boot tebes to’o ohin loron ita liberta ita nia nasaun
Husu ba ita hotu atu komunga espiritu nasionalizmu sentidu estadu, hodi ita boot sira nia arte marsiais, arte rituais hamutuk para garante paz no estabilidade, hanesan ita nia aman sira uluk utiliza arte marsiais para manan ita nia funu husu arte marsiais no arte rituais atu reuni fali forsa hodi luta ba dezenvolvimentu nasionál ,”esplika diretor jerál SEPS, iha ámbitu dialogu ho grupu arte marsiais sira iha suku Seloi Kraik, munisipíu Aileu, 09/12/2021.
Nia informa, lakleur tan tama ona ba eleisaun prezidensial, husu ita hotu importante mak garante paz no estabilidade, tanba liuhusi arte marsiais ministériu Interior (MI) ne’ebé responsavel ba seguransa interna komesa mai konsolida ona ho arte marsiais hotu hodi fo hanoin liuhusi meius sira ne’e hotu para garante paz no estabilidade iha eleisaun jerál ne’ebé sei mai.
Ha’u lori hela ministériu Interior no SEPS, nia naran, husu hela ba ha’u nia maun responsavel arte marsiais sira no arte cultural atu kontrola membru sira eduka sira fo hanoin sira atu sai instrumentu importante bele kria paz no estabilidade iha dezenvolvimentu nasional,”tenik Diretor jerál, SEPS.
Iha fatin hanesan Xefe suku Seloi Kraik, Gabriel Mendonca hateten, So juventude unidade mak iha estabilidade nasional la’o di’ak, maibé pela primeira vez ohin arte marsiais sira no rituais sira hotu akumula hamutuk sira hotu no mai ho atributu para am kuñese kle’an
Ohin oportunidade di’ak ida arte marsiais hotu hola fatin iha fatin ida –ne’e, durante ne’e ami hatene hela, maibé labele identifika, tanba lei bandu hela, ha’u atu hateten ba arte marsiais no rituais sira hotu, katak, keta haluha pasadu hanoin prezente no ita atu utiliza ba futuru,”esplika xefe suku Seloi Kraik.
Iha fatin hanesan, reprezentante arte marsiais husi IKS agradese tebes ba atividade ne’ebé realiza husi Sekretáriu Estadu Protesaun Sivíl (SEPS) liuhusi Diresaun Nasional Prevensaun Konflitu Komunitária (DNPKK), tanba bele fahe informasaun ne’ebé pertinente tebes.
Ohin ami agradese tebes ba ekipa ne’ebé mai partilla informasaun mai ami tanba informasaun sira ne’e pertenente tebes husi parte governu, ida-ne’e ami presiza tebes para ami hatene tanba hare ba iha pasadu governu suspende ona maibé agora governu deside re-ativa hikas, maibé la’o tuir lei ne’ebé iha,”dehan Responsavel másimu ba arte marsiais IKS, Gregorio Baptista.
Arte marsiais sira ne’ebé partisipa iha diálogu ne’e kompostu husi, IKS, PSHT, KORK, Padjajaran, Arte Ritual 12-12, no atividade realiza tanba hetan apoiu husi PLAN Internasional ne’ebé kada tinan sempre apoiu orsamentu ho montante liu $15.000 ba iha Diresaun nasionál Prevensaun Komflitu Komunitária nian, iha Sekretáriu Estadu Protesaun Sivíl(SEPS) tanba liga ho misaun no misaun PLAN Internasional nian kona-ba prevensaun komflitu liuliu hasoru feto no labrik.
Iha atividade dialogu ne’e hetan partisipasaun husi autoriedade lokál, reprezentante PLAN Internasional no komando munisipíu Aileu ho nia estrutura, OPS, ho Diretur DNPKK, nomos komunidade sira iha suku Seloi Kraik.
Jornalista : Egidio Nono
Editor : Agapito de Deus
