Lafaek News—Sekretáriu Estadu Komunikasaun Sosiál (SEKOMS), kinta (18/03/21), hala’o sorumutu ho parte Ministériu Saúde (MS), no Sentru Integradu Jestaun Krize (CIJK-sigla portugues), atu kombate informasaun falsa (hoax) ne’ebé espalla iha media sosiál.
Sekretáriu Estadu ba Komunikasaun Sosiál (SEKOMS), Merício Juvinal dos Reis “AKARA” informa, oinsá masimiza partisipasaun media hodi kombate hoax iha situasaun emerjénsia nune’e bele divulga informasaun sira ho efetivu no efikaz ba públiku.
“Ami husi SEKOMS prontu kolabora ho MS no CIJC tanba ita nia dever, mak tenki divulga informasaun ne’ebé kredivel ba sidadaun hotu liuliu kona-ba COVID-19, hodi Evita hoax,” Dehan Mericio Akara ba jornalista iha sala reuniaun SEKOMS Palasiu Governu Dili, Kinta semana ne’e.
Akara esplika, ba oin tenke fó informasaun lo-loos ba populasaun sira, tan ne’e husu ba sidadaun hotu fó konfiansa nafatin ba estadu no governu hodi kontrola situasaun iha teritóriu nune’e populasaun sira labele mate no hamlaha tanba COVID-19.
Iha fatin hanesan, Diretór Ministériu Saúde, Carlito Freitas, haktuirhusi Ministériu Saúde iha pilares ne’ebé responsavel ba iha komunikasaun risku involvimentu komunidade, durante iha divulgasaun informasaun liu-liu kona-ba COVID-19 nian no informaasaun falsa.
“Ami labele hala’o servisu mesak tanba ne’e husu apoiu SEKOMS nune’e ba media sira seluk bele apoiu hodi hakman servisu ida ne’e hodi divulga informasaun liga ba COVID-19 inklui hoax nebe’e espalha iha komunidade nia le’et,” Nia deklara.
Entretantu Iha sorumutu ne’e akompaña husi Prezidente RTTL.EP, Prezidente TATOLI.IP, Asesora Juridika SEKOMS, Asesor Gabinete Primeiru Ministru, Xefe Gabinete SEKOMS no Diretór DNPDML.
Jornalista : Orlando Magno
Editora : Nelya Barros
