Lautém (Lafaek News)-Divina Ximenes ho tinan sanolu resin neen (16) hakotu nia vida liuhusi meus tara a’an iha aldeia Nakroman, suku Fuiloru, postu administrativu Lospalos, munisípiu Lautém.

Tuir deklarasaun Komandante Polísia Nasionál Timor Leste (PNTL) Munisípiu Lautém, Superintendente António Rego Fernandes, informa, alin feto ne’e mate tanba tara a’an, entaun PNTL seidauk hatene lolos motivu saida mak bele alin feto tara a’an ne’e, tan ne’e PNTL sei kontinua identifika ba kazu ne’e.

“Horseik kuaze 12 Oras meudia, feto ida ho ida 16 tara a’an, ami hetan xamada no tuun diretamente ba iha aldeia nakroman, motivu lolos husi tara a’an ne’e polísia identifika katak nia mak tara a’an duni,” dehan Komandante PNTL Munisípiu Lautém, Superintendente António Rego Fernandes ba lafaeknews.com, Kinta (18/03/2021) iha Lautém.

Nia haktuir, tuir informasaun husi matebian nia aman, dadersan matebian ho nia laen sei ba konsulta iha Sentru Saúde Lospalos, sira fila ne’e, matebian nia laen ba tiha aldeia Punu no matebian hala’o asaun tara a’an hodi rezulta matebian mate iha fatin.

Nune’e, ezaminasaun husi parte Doutór sira nian katak, matebian nia isin lolon tomak buat ida la kona tan ne’e mak matebian nia família foti konkluzaun ida hodi la fó matebian ba halo autópsia no família dehan matebian mak hakarak ba tara a’an.

Tanba, matebian nia isin lolon parte hotu ho kondisaun di’ak no parte kakorok mak tali haka’as, matebian tara a’an ladok husi uma ne’ebé matebian hela ba.
Iha biban ne’e mós, família matebian lakohi fó mate isin hodi ba halo autópsia, agora dadauk Polísia entrega ona matebian ba família hodi hakoi tuir tradisaun kultura familia nian.

Jornalista : CE. Lautém

Editór        : Floriano Soares