Lafaek News—Ministériu Asuntus Parlamentares no Komunikasaun Sosiál (MAPKOMS), liu husi Sakretáriu Estadu Komunikasaun Sosiál (SEKOMS), segunda (23/08), oferese rádiu komunidade defisiénte ba ema ho defisiensia sira hodi tatoli rasik sira lian ba territóriu Timor laran tomak.
Prezidente Konsellu Rádiu Defisiente, Gaspar Afonso hateten, ida ne’e nu’udar situasaun primeira vez, maske iha koñesimentu minimu iha área komunikasaun, maibé tenta hodi husu tulun ba entidades sira atu fó apoiu nafatin, nune’e bele fasilita hodi tatoli difisiensia nia lian ba ema hotu.
“Ida ne’e situasaun ida primeira vez ba ami, mais ami atu hatete katak se ita la hahú bainhira se ita la koko ne’e oinsa, maske ami nia koñesimentu minimu iha área komunikasaun maibé ami tenta atu husu tulun ba entidade sira atu bele apoiu ami, atu nune’e ami nia lian ne’e la’os naton iha workshop sira, iha konferensia da inprensa sira maibé, ami rasik tatoli ba ami nia maluk sira iha Timor laran tomak, maske nia abertura iha dili laran maibé sira ne’ebé mak hela iha Dili ninin sira ne’e bele hatene ohin iha ona rádiu komunidade defisiénsia,” dehan Gaspar Afonso ba Jornalista hafoin workshop nasionál kona-ba konsellu no jestór rádiu, iha JL-Villa Fatuhada Dili, segunda (23/08/21).
Gaspar akresenta, sira aprende iha rádiu liberdade durante tempu naruk, neduni sira koko atu inklui an iha mundu media nian, maske sira ho kondisaun defisiénsia maibé hakarak koalia rasik sira nia direitu, sira nia asuntu no sira rasik hakarak sai jestór ba sira nia rádiu.
“Ami aprende iha radiu liberdade komesa iha tinan lubuk ami mós koko hakarak inklui an ba mundu média nian, atu nune’e ami ho ema difisiénsia hakarak koalia rasik ami nia direitu ami nia asuntu, ami hakarak rasik sai jestor ba ami nia radiu,” nia informa.
Enkuantu prezidente rádiu defisiente Gaspar Afonso mós agradese ba SEKOMS tanba oferese rádiu ida ne’e ba sira, ida ne’e faz parte ida hanesan implementasaun planu asaun nasionál ne’ebé mak iha ninia politika nasionál aprova ona iha 2012 rezolusaun governu númeru 14, maske sei ho dezafiu lubuk ida ho kondisaun hanesan ne’e, maibé sira lakohi sai bareira ka sai difikuldade, sai dezafiu ba sira.
Dadaun ne’e sira iha ona estatuta maibé seidauk ba rejistu, neduni iha loron hirak liu ba sira halo ona asembeleia jerál iha nia estrutura dadaun ne’e mós hetan apoiu husi SEKOMS no tempu badak sei halo instalasaub ba sira nia radiu ne’e no fin de setembru bele lansa ona rádiu komunidade defisiénsia. Neduni rádiu defisiente ne’e sei harii iha asosiasaun nia fatin, Ai-mutin JL-villa nia sorin no sira hetan fundus $3.275.
Jornalista Estajiadu : Azelio da Cruz
Asisten Editora : Juvita dos Santos
