Lafaeknews-Sekretáriu Estadu ba Komunikasaun Sosiál (SEKOMS), Merício Juvinal dos Reis “AKARA” husu ba mídia sira atu promove “Peace Journalism” iha Timor-Leste.
“Tempu agora mídia presiza kontribui ba situasaun hakmatek hodi promove Dame (Peace Journalism) iha ita nia Rai,” Akara ba Jornalista sira, Tersa, (13/04/2021), iha edifísiu SEKOMS, Palásiu Governu, Dili.
AKARA esplika, iha situasaun Covid-19 no dezastre naturais ne’ebé mak Timor-Leste hasoru dadaun, papel mídia importante tebes hodi kontribui ba ambiente hakmatek.
Nia husu ba mídia sira atu evita notísia provokativu ne’ebé iha tendénsia halo propaganda tuir interese polítika grupu nian ne’ebé iha tendénsia fahe ka sobu povu ninia unidade.
“Jornalizmu Dame importante atu hari unidade nasionál hodi bele hamutuk luta kontra COVID-19 no hamutuk rekonstrui infraestrutura ne’ebé hetan estraga husi inundasaun foin lalais,” Akara hakotu.
Jornalista :Orlando Magno
Editór : Floriano Soares
