Lafaek News—Sekeretariu Estadu Komunikasaun Sosial (SEKOMS), fo hanoin media nasionál hotu atu kobertura iha asuntu difesiénsia iha Timor Leste atu asesu informasaun husi parte governu, setor privadu no publiku iha rai laran.
Reprezentante husi SEKOMS hatun lia ne’e hafoin sai oradór principal iha diskusaun kona-ba ezisténsia ADTL iha programa ita nia bainaka iha kanal RTTL.EP Prezidente ADTL Ohin kuarta, (27/01) hodi hatoo rekomendasaun ba media nasionál atu tau mós prioridade kobertura iha asuntu difesiénsia nian no bele asesu mós informasaun iha rai laran.
“Iha tinan 2019 SEKOMS fo formasaun ba klibur difisiénte no konsege rekruta ema nain 15 maibé nain 5 la aguente, sira nain 10 mak konsege, da-daun ne’e nain 5 sai tradutór no nain 5 sei hala’o hela estájiu, no iha 2020 ami kontinua atu halo ida ne’e, maibé la konsege tanba estadu emerjénsia”dehan Jose Pereira Conceicão iha studio RTTL, kuarta 27/01/2021.
Objetivu prinsipal husi diskusaun ne’e maka oinsá atu loke konsiénsia públiku liu-liu fornesedor informasaun ba públiku hanesan setór públiku no setór privadu kona-ba difisiente nia asesu ba informasaun no oinsá papél media atu fasilita.
Reprezentante SEKOMS José Pereira da Conceição hateten, governu kontinua halo oinsá atu envolve ema ho difisiente sira atu promove no kapasita sira iha media no tenke defende direitu no dever ema ho difesiénsia, SEKOMS mós fo apoiu ba klibur difisiente sira oinsá bele kapasita tradutores sira, tanba difisiente tilun sira presiza tradutór atu nune’e sira bele akompaña no hatoo mós informasaun.
Iha fatin hanesan reprezentante media RTTL.ep. Horacio Babo, haktuir media RTTL hanesan média públiku signifika nain ba povu hotu-hotu no maluk sira difisénsia mós pertense iha públiku ida ne’e, karik RTTL halo programa ruma ka buat ruma ne’ebé produz públiku la akompaña ne’e media RTTL triste tebes.
“Iha tinan hirak liu ba ami la halo buat barak ba maluk defisiente sira, maibé ho ADTL nia koperasaun no servisu hamutuk ami konsege halo buat kiik ruma, ezemplu hanesan selebra loron difesiénsia nian, RTTL sempre hola parte iha nebá, no iha 2019 ami hahú traduz lian ho jestores sira iha ami nia publikasaun” informa Horacio Babo
Iha fatin hanesan Xefe Redasaun Lafaek News atual Vise Prezidente Asosiasaun Jornalista Timor-Leste (AJTL), Acacio Pinto, reforsa iha tinan hirak liu ba AJTL konvoka ona reuniaun ida ba jornalista sira oinsá bele halo kobertura ba asuntu difesiénsia sira.
“Da-daun ne’e hau núdar xefe redasaun iha Lafaek News, durante ne’e ha’u orienta ba kolega jornalista sira katak, ita tenke foku liu ba notísia sosiál nian, ne’e duni realidade ema barak ajuda halo nia uma, too ema kontaktu ami, ami dehan ami nia papél lo-loos mak rekolla informasaun no publika tau kedas ami nia númeru kontaktu iha ne’ebá, karik ita boot sira presiza ajuda bele ba, maibé ami la presiza envolve iha laran, no dala barak iha ami nia kobertura sempre too nia fatin hodi halo komunika ho inan-aman ka familia, atu nune’e ami bele hatene klean liu tan” dehan Acacio Pinto iha studio RTTL.
Entretantu, Prezidente Asosiasaun Difesiénsia Timor-Leste (ADTL) Cesário Silva, hateten dahuluk sira apresia ba koperasaun Alemaña atu apoiu atividade ida ne’e hodi promove diskusaun asuntu difesiénsia nian, nune’e ema hotu iha direitu atu ko’alia sai informasaun no simu informasaun ne’ebé lo-loos.
“Ami nia papél atu asegura katak ema ho difisiénsia hotu tenke hetan informasaun hanesan ho sosiedade sira seluk, no durante ne’e ita nia grupu balun sedauk asesu informasaun ida lolos atu koloka , ezemplu defisiente matan sira, hanesan ita nia jornal sira sira labele lee, no defisiente matan hahú ona halo tradusaun lian jestuál iha notisia ne’ebé fo sai iha RTTL” informa Cesario Silva.
Entretantu oradór principal ne’ebé partisipa iha diskusaun liu husi ita nia bainaka reprezentante SEKOMS, Jose Pereira Conceição, reprezentante Media RTTL, Horacio Babo, prezidente ADTL Cesario Silva no Xefe redasaun Lafaek News Acacio Pinto.
Jornalista : Juvita dos Santos
Editora : Nelya Barros
