Lafaek News—Sekretariu Estadu Juventude no Desportu (SEJD), Abrão Saldanha, hala’o sorumutu ho Primeiru Ministru (PM), Taur Matan Ruak, informa kona-ba preparasaun ba selebrasaun loron nasionál juventude Masakre Santa Kruz 12 de novembru, nune’e entrega ba joventude maka lidera tanba orsamentu limitadu.
Sekretàriu Estadu Juventude no Desportu (SEJD), katak ligadu ho pandemia Covid-19 ho orsamentu ne’ebé limitadu tanba ne’e la lidera organizasaun juventude sira, nune’e ita entrega ba juventude rasik mak lidera.
“SEJD hakarak husik ba Juventude mak komemora tanba loron ne’e nudar loron juventude nian, nune’e ami nia papél mak atu apoiu no finansia depende ba kreatividade ne’ebé joven sira aprezenta,” Informa Sekretariu Estadu Juventude no Desportu Abrão Saldanha, ba jornalista sira hafoin sorumutu no Primeiru Ministru iha Palasio do Guvernu, segunda (09/11/2020).
Nia esplika, ida ne’e parte ida oinsa mak joven sira atu istimula kreatividade joven sira nian, no husi selebrasaun ne’e estadu mak deklara nune’e joven sira mak halo festeza ba sira nia loron rasik, entaun orsamentu ne’ebé atu finansia atividade ida ne’e hamutuk $ 104 mill maibé iha nasional kuarenta i tal mill no barak liu iha munisípiu.
Alende ne’e mós prezidente komisaun organizadora Masakre Santa Cruz, Zaulino Gomes da Silva, hateten, eventu komemorasaun masakre Santa Kruz no selebrasaun loron nasional juventude, entaun komisaun mós planu atividade lubuk ida, mak hanesan kompetisaun pintura, hakerek, Drum band, semináriu nasional, konsertu múzika nune’e mós hala’o atividade sosiál hanesam limpeza.
“Ita mós halo atividade reflesaun iha 11 novembru kalan hodi hanoin hikas fali masakre santa cruz 12 novembru, aleinde ne’e ita mós sei iha misa ba masakre santa kruz tuku 7 ho balun iha igreja Motael,” Zaulino hakotu
Jornalista : Juvita dos Santos
Asistensia Editór : Pedro de Almeida
