Lakló-(Lafaek News)—Mate-Restu 12 de Novembru, Augusto Correira alias Mate Netik, espresa nia esperénsia masakre santa krúz iha tinan 1991 hafoin kari aifunan saudozu Sebastião Gomes iha semitériu santa krús.
Iha akontesimentu ne’e, involve estudante Timoroan lubun ida, inklui Augosto Correira ho kódigu “Mate Netik” (48) moris iha Lakló, iha loron 05 fulan Agostu tinan 1972, nuudár eis estudante husi eskola São Pedro Komoro, ne’ebé iha altura ne’ebá partisipa mós missa iha Igreja Motael, hafoin missa, sira direta akompaña ai-funan ba tau iha rate santa krús.
Mate Netik partisipasaun ativa iha demonstrasaun sira liu-liu liga ho nia akompañamnetu ai-funan Saudozu Sebastiăo Gomes nian, ikus mai nia la konsege pasa ba klase 2 no nafatin hela iha klase 1 iha eskola Sekundária Katólika Saun Pedro Komoro.
Mate restu 12 Novembru 1991, Augosto Correira haktuir, iha marxa demonstrasaun ba iha semiteiru Santa Kruz, nia ho kolega sira seluk la’o iha grupu ne’ebé ikus liu tanba akompaña ho sira husi parte lojístika nian ne’ebé lori hela ho hahán.
“Ha’u haree iha ne’ebá maka, ema tiru ona, ema halai namakari, ami lahatene dehan atu halai ba ne’ebé, tanba tiru ne’e mai husi rate militar sira nian iha oin”, haktuir mate restu 12 Novembru Augosto Correia “Mate Netik”, ba Lafaek News iha nia rezidénsia Laclo,domingu, (10/11/2020).
Nia konta, istoria iha momentu ne’eba bainhira TNI sira tiru, nia haree kolega balun halai ho isin-molik, hasai roupa, balun sapatu laiha, ain-tanan, no balu ema tiru ona toba de’it iha fatin.
Nia dehan, sentimentu úniku ne’ebé nia haree no sei lembra iha momentu ne’ebá maka sira balu halai iha mate nia leten, maibé esperiénsia hatudu katak, halai ne’e hanesan klamar laiha ona.
“Ba iha subar fatin mak foin hakfodak dehan ha’u iha subar fatin ona. Maibé, esperiénsia haree katak halai iha mate nia leten, tanba atu hasees de’it. Ida ne’e mak hanesan akontesimentu 12 Novembru ne’e ha’u assiste direta hanesan mate-restu ida”, nia hakotu.
Jornalista : RPC
Editora : Nelya Barros
