Lafaek News—Sekretariu Estadu Joventude no Desportu (SEJD) Abrão Nokosiku Saldanha, asina akordu ho dirijente sira hodi alkansa planu asaun anual 2021.
“Akordu ida ne’e kontein alkansa hirak ne’ebé dirijente sira SEJD nian atu atinji to’o fulan-Juñu tinan ida ne’e. Alkansa sira ne’e foti husi SEJD nia Planu Asaun Annual ba tinan-2021, ne’ebé mak hatuur ona meta sira mak SEJD hakarak atu atinji no mós asaun hirak ne’ebé diresaun idaidak atu hola hodi atinji meta sira ne’e,” hakruir iha komunikadu ne’ebé lafaek news asesu iha sesta, (05/02/2021).
Sita iha komunikadu ne’e, dokumentu kompromisu ne’e deklara katak dirijente sira ho Sekretariu Estadu konkorda malu hodi hatuur atinjimentu sira ne’ebé mak dirijente sira ne’e atu atinji iha sira nia diresaun ka unidade ida-idak, ne’ebé sei kontribui ba prestasaun serbisu SEJD nian. Kaer ba akordu ida ne’e mak dirijente sira hatur target no fahe serbisu ba sira nia chefe no funsionariu sira, ne’ebé sei sai sasukat ba sira nia prestasaun serbisu.
“Kompromisu hirak ne’e mak sai hanesan baze avaliasaun ba Diresaun nia serbisu, hahu husi dirijente sira diresaun nian; Diretor Nasional no Chefe Departamentu to’o funsionariu sira,” tenik iha komunikadu.
SEJD Abrão dehan akordu ne’e, intensaun importante ida husi dokumentu ne’ebé mak Sekretariu Estadu asina ho dirijente sira ohin mak atu ajuda trasa objetivu sira ne’ebé mak SEJD hanesan instituisaun hakarak atu atinji iha fulan neen mai ne’e nia laran.
“Ho ida ne’e, dirijente idaidak hatene ona ninia target rasik, nune’e diriji ninia ekipa no mós serbisu hamutuk ho ekipa seluk iha SEJD laran atu hetan duni rezultadu ne’ebé mak sira rasik identifika no kompromete an atu atinji,” dehan Abrão Saldanha.
Nia dehan, liu husi akordu ne’e sei haforsa servisu sekretariu estadu joventude no desportu ba estadu no povu.
“Ha’u fiar katak akordu ida ne’e sei ajuda dudu no haforte espíritu serbisu ekipa nian no hadi’ak liután sentidu de pertense iha SEJD hodi bele presta serbisu diak liu tan ba Estadu no ba povu,” tuir nia.
Nia fundamenta, foin ba dahuluk iha SEJD mak membru governu ida asina akordu ho ninia kolaborador sira hodi kompromete atu serbisu hamutuk ba atinje SEJD nia planu asaun anual.
Jornalista : Pedro de Almeida
Editora : Nelya Barros
