Lafaek News—Sekretaria Estadu ba Igualidade no Inklusaun ( SEII), Maria José da Fonseca Monteiro de Jesus, segunda (23/11/2020), hasoru malu ho Primeiru Ministru, Taur Matan Ruak, hodi informa akordo entre KOICA ho Nasoens Unidas ne’ebé apoiu husi governu Koreano mai Timor Leste hodi kombate violénsia hasoru feto no labarik feto.
Sekretaria Estadu ba Igualidade no Inklusaun (SEII), Maria José da Fonseca Monteiro de Jesus. foto Ajano.
“Kona-bá asina akordo entre KOICA ho Nasoens Unidas ba programa foun hamutuk ho igualidade, ne’ebé apoiu husi governu Koreano nian, liu husi Nasoens Unidas mai governu Timor Leste hodi komplementa esforsu governu nian kombate ba violénsia no mós progrma sira seluk,” hateten SEII Maria José da Fonseca, iha palsaiu governu hafoin hasoru xefe governu Taur Matan Ruak, segunda, (23/11/2020).
Governante ne’e relata, intensaun reuniaun ho xefe governu ne’e atu bele hetan osan husi OJE 2020 ba sensivel igualidade jenéru no defisiénsia inklui responde ba nesesidade kompetente hotu iha sosiedade, kona-ba akordu entre KOICA ho UN liga duni ho programa igualidade jenéru atu reforsa oinsá kombate violénsia kontra feto no labarik.
“Programa ne’e sei implementa iha munisípiu tolu no mós RAEOA iha nivel nasionál ba ninia koordensaun besik SEII nia instituisaun ne’ebé lidera planu asaun nasionál kontra violénsia bazea ba Jenéru, munisipiu tolu maka Baucau, Dili, RAEOA no nivel nasionál,” dehan Nia.
Aleinde ne’e SEII kontinua halo advokasia ba asuntu igualidade inklusaun nian ne’ebé instituisaun implementadora, tan ne’e iha SEII nia advokasia durante ne’e sempre ko’alia kona-ba orsamentu sensível jenéru, ema ho defisiénsia no mós komponente hotu-hotu iha sosiedade.
“Ami hakarak asegura katak bele halo desenvolvimentu ida diak wainhira ita nia intervemsaun fo benefisiu ba ema hotu tantu labarik feto labarik mane no ema ho difisiensia, atu bele aselera desenvolvimentu di’ak liu tan, ha’u koalia hotu instituisaun privadu ho públiku atu asegura katak intervensaun saida maka ita halo tenke hare’e hamenus desigualidade no diskriminasaun ita nia komunidade, advokasia iha tempu naruk nia laran, ita iha progresu lubuk ida, ita nafatin hasoru difikuldade loron-loron la’os katak ita laiha ona problema, maibé iha progresu sira ne’ebé iha ita tenke rekoiñese,” dehan governante ne’e.
Jornalista : Pedro de Almeida
Editora : Nelya Barros
