Komunidade sunu lixu ne’ebe namkari iha lixu fatin, tanba parte saneamentu munisipiu la rekoilla lixu hirak ne’e ba tau iha fatin propriu. foto LN : Elidio Castro.
Lautém-(Lafaek News)—Lixu abandona durante fulan rua ona iha postu administrativu Lospalos, munsipiu Lautem, ho razaun governu lokál laiha osan selu funsionáriu saneamentu atu rekoilla lixu sira ne’ebé komunidade sira so’e namkari iha lixu fatin.
“Lixu sira iha villa Lospalos ne’e administrasaun munisípiu mak responsablija kuaje fulan ida ona foer sira ne’e la raut tanba orasamente laiha ona,” dehan administrador Lospalos Radio Lopes ba lafaek news foin lalais ne’e.
Hodi dehan, ema sira raut foer no kareta ne’ebé tula lixu hapara ona kontratu, tanba osan laiha atu selu sira, posibilidade lixu sira ne’e sei abandona too 2021.
‘Ita laiha osan propriu ida atu selu tanba ne’e fulan Novembru no Dezembru ita laiha osan atu selu ema sira,” katak Radio Lopes.
Administradór postu Lospalos ne’e, hateten nia parte esforsu koordena ho administradór munisípiu atu buka solusiona problema lixu hirak iha villa laran ne’e, maibé seidauk iha data fixu ida tanba foin tama iha fase koordenasaun, durante raut Lixu iha Lospalos villa ne’e iha pessoal hamutuk 21 inklui karreta ida.
Entretantu observasaun lafaek News iha treinu nota katak lixu iha sentru saúde internamentu Lospalos nia oin aumenta barak ba bei-beik no komunidade sira sunu kria ambiente la ho saudável.
Jornalista : Elidio Castro
Editora : Nelya Barros
