Lafaek News-IX governu liu husi Sekretáriu Estadu Formasaun Professional no Empregu (SEFOPE), Sesta 20/10/2023, hala’o serimonia despedida ho kandidatu traballadór Timor-Oan hamutuk 48 ne’ebé atu ba servisu iha nasaun Korea-Súl.
Sekretáriu Estadu Formasaun Profesional no Empregu, Rogério de Araújo Mendonça iha nia diskursu hatete, nia parte agradese ba governu Korea-Súl ne’ebé servisu hamutuk ho estadu Timor-Leste, liuhusi Sekretariu Estadu Formasaun Profesional no Empregu (SEFOPE) hodi realiza mobilidade laboral hahú husi tinan 2009 to’o tinan 2023 ida ne’e.
“Agradese mós ba família sira hotu ne’ebé mak eduka ita bo’ot sira nia oan hodi bele tuir formasaun, hahú husi inisiu to’o ohin loron bele asesu ba empregu iha rai liur, tanbá susesu ne’ebé mak ita bo’ot sira hetan, ida ne’e sai hanesan orgullu bo’ot ida ba nia rai doben ida ne’e nomós ba familia sira, hanesan ita hatene katak iha Timor-Leste problema ne’ebé mak ita hasoru ka estadu hasoru mak problema desempregu,” Rogéiro dehan.
Governante ne’e akresenta tan, Liuhusi traballadór na’in 48 ne’ebé hetan oportunidade hodi ba servisu iha Korea-Súl, husi númeru hirak ne’e peskas iha ema na’in 43 no fabrika iha 5, husi na’in 5 ne’e hetan re-entre fila fali ba iha Korea, atu hatudu katak sira na’in 5 ne’ebé mak servisu durante iha Korea hatudu sira nia komportamentu di’ak, abilidade di’ak, sira nia progresu servisu diak ohin kompaña Korea bolu fila fali sira hodi ba kontinua servisu iha ne’ebá.
“Husu ba traballadór sira hotu ba servisu iha nasaun Korea-Súl, imi tenke hatudu komportamentu di’ak iha servisu no evita halai sai husi Sistema, tanbá imi sai husi Sistema di’ak, maibé problema ruma ne’ebé mak akontese ba imi hanesan hetan desastre ruma ka moras ruma atu ba hetan tratamentu iha ospitál, imi sei la hetan oportunidade atu kura moras saida deit mak imi hetan, tanbá ne’e husu ba imi hotu tenke kumpri promesa saida mak imi halo, atu nune’e evita halai sai husi Sistema,” governante ne’e sublina.
Entretan Diretór Nasional Emprega Estranjeiru (DNEE), João Corea Pereira, reforsa tan katak, Desde inísiu to’o ohin loron SEFOPE haruka ona traballadór ba servisu iha nasaun Korea-Súl hamuruk 5810 no husi númeru ne’e kompostu husi mane na’in 5752 no feto hamutuk 158, nune’e mós husi traballadór Timor-Oan hirak ne’ebé mak ba servisu iha korea no sira ne’ebé mak fila ona mai Timor hamutuk 4674.
“Husi númeru hirak ne’e ema ne’ebé servisu iha Sistema hamutuk 3441 no ida ne’ebé mak sai husi Sistema hamutuk 1250, husi traballadór ne’ebé hamutuk 5810, na’in 15 mak hetan asidente no lakon vida, tanba ne’e husi númeru traballadór hirak ne’ebé mak mensiona iha leten, ba servisu iha área tolu mak hanesan, peskas, fabrika no agrikultura, ema ne’ebé servisu iha area peskas hamutuk 3685, fabrika hamutuk 1999 no agrikultura hamutuk 126, husi númeru hirak ne’e hahú husi tinan 2009 to’o ohin loron,” hakotu nia.
Jornalista : Crispin de J. Amaral
Editor : Paulo Collo
