Lafaek News—Sekretáriu Estadu Formasaun Profesional no Empregu (SEFOPE), Kinta 18/01/2024, halo seremonia despedida ho kandidatu traballadór Timor-oan hamutuk 85 ne’ebé sei ranaka ba servisu iha Austrália.
Diretór Jerál Formasaun Professional no Empregu (FPE), Carlito Rogeiro Cabral, relata traballadór Timor-oan hamutuk 85 ba servisu iha nasaun Austrália no husi traballadór 85 ne’e, iha ema foun hamutuk 45 no traballadór ne’ebé ba mai hamutuk 40, husi númeru traballadór hirak ne’e servisu iha area agrikultura.
“Husi kandidatu traballadór na’in 85, ne’ebé tempu badak sei aranka ba servisu iha nasaun Austrália kompostu husi feto 19 no mane 66, husi númeru traballadór hirak ne’ebé ohin ita halo despedida ne’e, konta hamutuk ho sira ne’ebé mak ba ona Austrália iha fulan ida ne’e hamutuk 200 resin,” Carlito Rogeiro Cabral informa.
Carlito hatete, husu ba traballadór sira hotu ba servisu labele halai sai husi Sistema, imi tenki kumpri promesa sira ne’ebé mak ohin imi halo, tanba imi sai husi Sistema sei prejudika ba programa ne’e rasik no taka dalan ba ita nia kandidatu sira ne’ebé mak agora prepara hein hela prosesu balu hodi ba servisu iha Austrália.
“Se traballadór sira mak halai sai husi Sistema, ita buka atu servisu hamutuk ho adidu iha Austrália no governadór Austrália nomós empregadór sira rasik, oinsá ita bele resolve no mós bele haruka sira fila tuir kontratu ne’ebé estabelese ona”. Carlito dehan.
Entretantu Diretór Jeral Servisu Kooperativu, Nelson Carvalho, informa katak, akordu ne’ebé ohin traballadór sira halo imi tenke la’o tuir, la’o tuir atu nune’e bele fó nafatin imagem di’ak ba ita nia nasaun Timor-Leste, tanba ita bo’ot sira mak loke oportunidade ba joven sira ne’ebé mak sei tuir mai atu ba servisu iha nasaun Austrália.
“Karik ita bo’ot sira ba mak halai sai husi Sistema, signifika katak ita bo’ot sira sei taka dalan iha tempu ida ba ita nia joven sira, maibé ami fiar katak ita bo’ot sira ba servisu iha ne’eba sei la halai sai husi Sistema, sé imi halai sai husi Sistema signifika katak imi lakoi atu fila ona mai Timor, nomós atu dehan ba inan aman sira ne’ebé mak agora oan atu ba servisu iha Austrália, husu ba inan aman sira nafatin halo komunikasaun di’ak traballadór sira, labele kontente ho sira ba ona, depois ita kontenti iha fatin, katak, ha’u nia oan ba, ha’u telefone tenki haruka osan mai, maibé keta haluhan mós ita nia dever atu reza ba sira”. Nelson dehan.
Diretór ne’e dehan, husu ba traballadór sira hotu, importante imi labele halai sai husi Sistema, tanba liuhusi politika sekretariu estadu professional no empregu, nia halo politika deit hodi kria kondisaun haruka ita nia joven sira ba servisu iha rai liur, tanba ita bo’ot sir aba servisu iha rai liur hodi hadia ekonomia familia uma laran, la’os servisu hetan osan mete joga, sé imi mete ona iha joga, ami fiar katak imi servisu tinan sanulu fila mai mós seidauk halo uma ida labele.
Jornalista : Crispin De Jesus Amaral.
Editór : Agapito de Deus
