Lafaek News—IX Governu liuhusi Sekretaria Estadu Formasaun Professional no Empregu (SEFOPE), Tersa, 19/03/2024, realiza seremonia despedida ho kandidatu traballadór Timor-oan hamutuk 40 ne’ebé sei aranka ba servisu iha Austrália.
Sekretariu Estadu Formasaun Profesional no Empregu, Rogério de Araújo Mendonça, relata traballadór Timor-oan hamutuk 43 sei ba servisu iha nasaun Austrália, husi traballadór 43 ne’e, traballadór ne’ebé re-entri ka ba mai hamutuk 31 no iha ema foun hamutuk 12, husi traballadór hirak ne’e servisu iha área agrikultura.
“Husi kandidatu traballadór na’in 43, ne’ebé tempu badak sei aranka ba sevisu iha nasaun Austrália, husi númeru traballadór hirak ne’e kompostu husi mane hotu, objetivu ita nia seremonia despedida ida ne’e importante tebes, hahú husi traballadóres ne’ebé mak atu desloka ba Austrália, Korea no Japan, ita sempre realiza seremonia despedida ida ne’e”, Sekretariu Estadu Formasaun Profesional no Empregu, Rogério de Araújo Mendonça informa.
Objetivu prisipal husi seremonia despedida ida ne’e hodi hato’o lia-menon ruma ba traballadóres sira, atu nune’e traballadóres hotu ba servisu iha ema nia rai tenke koumpri duni regras no prosedimentu legais sira ne’ebé mak estadu Timor hamutuk ho estadu Austrália realiza.
“Husu ba traballadóres sira ne’ebé mak re-entri hamutuk 31 no foun hamutuk 12, husu imi hotu ba tenki adapta ho imi nia maluk sira ne’ebé mak sempre ba mai ne’e, tanba imi nia maluk sira ne’ebé mak re-entri ne’e, sira nia atitude, sira nia komportamentu durante servisu iha ne’eba diak tebes, hodi kompaña ne’ebé durante sira servisu ba hodi bolu fila fali sira”, Rogério Araújo haktuir.
Entretantu Diretór Nasional Emprega Estranjeiru (DNEE), João Corea Pereira, reforsa tan katak, objetivu ita hamutuk iha ne’e, hanesan baibain antes ita nia traballadór sira atu ba servisu iha Austrália ita sempre iha kustume ida asina deklarasaun husi familia ho estadu.
“Tanba ne’e ohin traballadór sira ne’ebé mak ita halo despedida hamutuk 43, husi kandidatu 43 ne’e, ita iha traballadór sira ne’ebé re-entri ka ba mai hela deit hamutuk 31 no traballadór foun hamutuk 12, husi kandidatu hirak ne’e, maioria mane hotu, husi númeru traballadór hirak ne’e, iha empreza lima (5), mak sei emprega sira, aleinde ne’e mós traballadór hirak ne’e husi vareaves hotu mai husi munisipiu hotu-hotu hodi envolve-an iha laran hotu”, João Corea Pereira, hakotu.
Jornalista : Crispin de J. Amaral
Editór : Agapito de Deus
