Lafaek News—Sekretáriu Estadu Arte no Kultura (SEAK), Teofilo Caldas Informa, konfirmadu fatin armajen Bebora sei entrega ba Arte-Moris,maibé sei bolu responsavel Arte Moris hodi diskute kona-ba asuntu ne’e iha semana oin.
“Ami presiza fatin ruma tenki halo pedidu ba Terras mak iha kompeténsia atu atribui fatin mai ita ka lae, horseik horibainrua konfirma ona katak fatin Armajen Bebora ne’e entrega ona ba Arte Moris, ha’u hanoin semana oin bolu responsavel Arte Moris nian para atu bele kordena tok asuntu ne’e,” dehan Teofilo Caldas ba Jornalista sira, hafoin partisipa Abertura Seminariu “Jestaun Administrasaun Publico no Utilizasaun Patrimonio Estadu ne’ebe di’ak kontribui ba boa Governasaun no Jestaun Instituisional nian, iha Salaun Novu Turizmu Licidere, Kinta-feira, (24/06/2021).
Sekretariu estadu esplika, grupu Arte moris ninia atividade artezantu ne’e kompeténsia SEAK nian no iha dever atu toma atensaun, maibé sobre fatin kompetensia Sekretariu Esatdu Terras Propriedades (SETP) nian.
“Tanba ne’e espera katak Arte moris tenki simu fatin ne’e, depois mak hare’e kondisaun sira ne’e oinsa mak bele hadia, em prinsípiu tenki simu,” tenik Teofilio.
Tan ne’e atu muda grupu Arte Moris, ne’e kompeténsia Konsellu Veteranus nian ho Ministériu Asunu Kombatentes Libertasaun, tanba sira mak nain ba fatin refere.
“Uluk nain mak ami mas orientasaun husi Primeiru Ministru entrega ba ita nia konsellu Veteranus, ami lakoi diskute ho Xefe Governu, ami prontu ezekuta ordem entaun ami fó tiha ba konsellu Veteranus máka responsabiliza,” nia hakotu.
Jornalista : João da Costa Soares
Asisten Editór : Pedro de Almeida
