Venilale-(Lafaek News)—Sekretáriu Estadu Ambiente (SEA), Demetrio Do Amaral De Carvalho , afirma sei uza kódigu penal 215-221, kona-ba modalidade krime ambiental hodi lori ba prosesu judisial bainhihra kompañia la hadiak sítiu istóriku ne’e iha loron 30 nia laran.
Objetivu husi inspesaun SEA, Demetrio Do Amaral De Carvalho ho nia ekipa atu haree diretamente Kondisaun sítiu kultural no turizmu Kuak 8 ne’ebé hetan estragus husi rebilitasaun estrada Diresaun Baukau-Vikeke ne’ebé implementa husi Kompañia China Railway Internasionál Group CP LTD Covec.
“Ha’u hakarak atu imi halo planu mitigasaun atu hadiak fila fali Sitio hirak nee iha loron 30 Nia laran Hodi apresenta ,se lahalo Planu mitigasaun Hau sei uja kodigo penal artigu 215-221 Kona ba modalidade krimes Ambiental nebe regula iha kodiku penal ,Hau sei lori ba prosesu judisial,” dehan SEA, Demetrio Do Amaral De Carvalho, liu husi pajina FB SEA ne’ebe lafaek news asesu iha sábadu (13/02/21), bainhira SEA halo inspesaun urjensia iha lokal konstrusaun hodi koalia ho kompania ne’ebe’ estraga Caverna refere.
Iha inspesaun urjente ne’e, Sekreáriu Estadu Ambiente Demetrio Do Amaral De Carvalho akompañia diretór nasional biodiversidade, Rui Pires, tékniku ajénsia nasionál lisensiamentu ambiental, hamutuk ho ambiente munisípiu Baukau halo inspesaun hodi intervensaun ba raikuak (caverna) memorial Japaun iha funu mundial daruak ne’ebé hetan estragus husi reabilitasaun Estrada Baukau- Vikeke.
Iha Inspesaun refere Sekretaria Estadu Ambiente haree duni katak Sítiu Turizmu kuak 8 iha area refere hetan estragus duni husi atividade eskavasaun rai no hetan duni Impaktu negativu ba Kuak refere, tanba Kuak 8 ne’ebé Iha area refere Rai taka hotu.
Sekretariu Estadu Ambiente (SEA) Demetrio Do Amaral De Carvalho bainhira hasoru malu ho kontratór no konsultan kompañia refere atu halo planu mitigasaun hodi hadiak fila fali sitiu Kuak 8 ne’ebé hetan estragus iha loron 30 nia laran hodi ba aprezenta ba governu.
Iha loron hanesan SEA ho nia ekipa inklui mós xefe suku Bukoli hala’o mós vizita ba kuak-7 (gua Tujuh) ne’ebé ho distánsia kilu metro 5 husi caverna Kaibulori, no Inspesaun ne’e akompanha husi Polísia Nasionál Timor-Leste Munisípiu Baukau inkli polísia eskuadra Venilale.
Jornalista : Acacio Pinto
Editora : Nelya Barros
