Lafaek News—Konsellu Kombatente Libertasaun Nasionál (KKLN), Vidál de Jesus “Riak Leman” husu ba Ministériu Ensinu Superior Siensia no Kultura (MESKK) ho Reitór atu rezolve problema veteranu oan sira ne’ebé la asesu ba Universidade Nasionál Timor-Lorosa’e(UNTL) tuir rejime espesial.
“Ohin realiza sorumutu ne’e ho Primeiru Ministru Taur Matan Ruak hodi ko’alia kona-ba asuntu edukasaun tanba relasiona ho veteranus nia oan tanba veteranu nia ona barak la asesu ba UNTL, no ami iha konsellu ne’ebá loro-loron estudante sira ba iha ne’ebá barak loos, hanesan fali UNTL mak iha fali konsellu ne’ebá halo ami ulun fatuk moras,” katak PAKKLN Vidál Riak Leman ba Jornalista sira hafoin remata enkontru ho PM iha Palasiu Governu, Kinta (25/02/21).
Nia akresenta, Ministru Ensinu Superior Siénsia no Kultura (MESSK) dehan atu simu maibé fatin laiha, maibé Reitór UNTL nafatin dehan fatin sei iha atu simu tan estudante rihun ida.
“Ha’u nia hanoin Ministru ho Reitór bele tuur hamutuk atu haree problema ida ne’e hodi fo solusaun se la’e, ita kria fali konfuzaun ba ita nia estudante sira, ita nia oan sira atu eskola, tanba ida dehan sei simu tan rihun ida no ida dehan fatin laiha ona, ne’e susar uituan no dala ruma ami konsellu ne’e hanesan fali ami mak Reitór fali, ne’ebé ami enfrenta problema ida ne’e,” dehan Riak Leman ba jornalista foin lalais.
Prezidente Administrasaun Konsellu Libertasaun Nasionál, Riak Leman, lamenta, estudante sira ne’ebé la pasa iha rejime espesial ba Universidade Nasionál Timor Loro sa’e (UNTL).
“Tanba iha tinan kotuk sira barak atu eskola iha UNTL, ne’e duni iha momentu ne’ebá Ministru dehan sira hein ba tinan oin, maibé tinan ida ne’e dehan labele dehan fali tinan ne’ebé situasaun ida ne’e mak akontese,” dehan Riak Leman.
Jornalista : Juvita dos Santos
Editora : Nelya Barros
