Lautém-(Lafaek News)— Relasiona ho akontesimentu ahi mate derepente iha Sentru Vila Lospalos iha Domingu (21/02/21) tuku 8:17 Otl kalan  rezulta klientes ida nia sasán eletrónika hanesan jeleira no taxu eletríka estragus.

Komunidade Aldeia 30 de Agostu, Suku Fuiloro Postu Lospalos, Isaac da Costa, husu ba parte EDTL-Ep Munisípiu Lautém atu bele identifika no atende lalais kauza husi ahi mate derrepente ne’e atu labele estraga komunidade sira nia sasán uma laran.

“Ahi mate derepente iha domingu kalan ne’e depois de mate dala ida ne’e iha ami nia uma laran ne’e ampolas 8 rabenta hotu depois ho zeleira ida ho tasu eletríku ba halo modo nian ida at hotu,” Dehan nia ba Lafaek News iha nia rejidensia 30 Agostu Ohin.

Isaac esplika, akontesimentu ahi mate lakan ne’e estrañu uituan, tanba fiu sira ne’ebé dada ba ampulas nian tarutu hanesan konxlete no lampu lakan mate hanesan motor nia lampu sand nune’e ikus mai rezulta ampolas iha uma laran nakfera hotu.

“Depois kalan tomak ne’e lampu moris fila-fali no piska-piska hela de’it, fiu (kabel) instalasaun iha uma laran mós tarutu arbiru, no iha loron segundu feira ami troka hotu lampu maibé nafatin nakfera hotu, rabenta hotu iha kabesa laran depois monu hotu ba rai,” haktuir kliente EDTL ne’e.

Hatan ba lamentasaun klientes EDTL ne’e,  Xefe Departamentu EDTL-Ep munisípiu Lautem, Siquito dos Santos, argumenta katak  ba da-daun ne’e parte subvensaun mak halo ona kontrolu iha sentru, maibé parte kontrolasaun da-daun ne’e sei la’o nafatin ho sistema manual, tan ne’e sei difikulta nafatin parte tékniku sira atu detekta lalais problema bainhira akontese ahi mate derrepente.

“Ita nia sistema kontrola sei ho Manual hotu entaun ita la bele Índika katak problema ne’e akontese iha ne’ebé? no iha rin númeru hira? so ita ba iha fatin mak bele hatene.” Informá nia bá Lafaek News iha nia kna’ar fatin kinta semana ne’e.

Xefe departamentu  EDTL Lautém ne’e fundamenta tan katak da-daun ne’e parte subvensaun mak kontrola, Lautém iha fiu 3. Faca R, S no T Ka Faca 1, 2 no 3, bainhira iha problema sira bele indika problema iha ne’ebá, jeralmente kuandu iha problema sira mós bele indentifika iha ne’ebá hodi fo informasaun ba tékniku sira, maibé atu identifika kauza ahi mate ne’e tékniku tenke tun diretamente.

“Durante ne’e ami nia kontrolasaun ne’e ita la’o de’it ho manual ne’ebé ita labele Índia katak akontese iha fatin ne’ebé só ita tenke ba mak ita bele hatene no antes atu ba ne’eba ita tenke hamate liña eletrisidade ida por ida atu ita bele hatene problema ne’e iha ne’ebé,” nia akresenta.

Xefe EDTL Lautém ne’e mós rekoñese  kazu ahi mate ne’e loron  21 kalan, ita iha Lospalos ita iha Fider ne’ebé ami konta iha diresaun tolu iha, diresaun primeiru, Sigundu no terseiru, foin da-daun diresaun ne’ebé hetan interupsaun ne’e iha vila laran.

“Bainhira akontese ahi mate ha’u haruka kedas ita nia tékniku sira ba iha terrenu hodi buka indikadór ba problema ne’e iha ne’ebé?” entaun kalan ne’e kedas ami halo atuasaun, enkuantu ahi mate hanesan ha’u haruka tékniku sira fukit parte ida pur parte ida atu ita bele halo identifikasaun lalais tanba kuandu ita hatama ahi tomak ita la hatene ninia problema ne’e iha ne’ebe,” Siquito subliña.

Kontribuitór  :  Joenaca da Conceição

Editora            : Nelya Barros