Lafaek News—Avó Alberto do Rosario moris iha tempu Japaun too ohin loron saúde sei forte no ko’alia sei moos, maibé la’o la di’ak no tenke hakdasak de’it iha rai hanesan labarik tanba impaktu husi uma lisan naksobu iha 2019 hanehan avó Alberto ho nia espoza too nia hetan la’o la di’ak too ohin loron la funsiona, no agora presiza tebes kadeira roda (kursi roda) ida atu bele ajuda nia tuu iha leten hodi lori nia la la’o.
Avo Alberto tuur hela iha uma laran atu hakdasak sai ba varanda oin hodi sente anin fresku . foto LN Orlando Magno.
“Ha’u presiza mak Kursi roda de’it ha’u la presiza buat seluk husi estadu sira tanba ne’e karik bele fo netik kursi roda mai ha’u atu ha’u bele tur iha leten nune’e ha’u la bele dolar de’it hanesan ne’e tanba ha’u dolar hanesan ne’e durante tinan 2 ona,” avó Alberto ho ko’alia ho oin tristeza hafoin hasoru malu ho jornalista lafaek news iha Bairru-pite, tersa semana ne’e.
Esperiénsia ne’e moruk nia hasoru dezde 2018, bainhira sira nia uma lisan naksobu monu tuun hanehan kedan avó Alberto nia ain iha uma laran hafoin família sira salva lori ba halo tratamentu iha sentru saúde inklui ho Ospitál Nasionál Guidu Valadares (HNGV), maibé too ohin loron laiha rezultadu no kontinua hakdasak.
“Iha 2019 ami nia uma lisan mak monu tan ami maibé hanesan ami la makas, maibé halo ha’u nia ain rua matek hotu, entaun ha’u ba halo tratamentu mos la di’ak nafatin,”dehan Avó Alberto ba Lafaek News iha Bairru-Pite Dili foin lalais.
defisiensia ain ne’e haktuir katak nia hakarak esforsu buka ema halo tratamentu ba nia ain ne’e atu bele la’o hikas hanesan ema normal, tanba ne’e mak husi Vikeke mai too Dili, maibé laiha rezultadu tenke fila fali ba nia munisípiu Vikeke.
“Ha’u sei ba fali Vikeke ona tanba ha’u mai iha ne’e sira sona ha’u dala 4 ona mos ha’u sente moras ne’e atu aumenta fali tanba ne’e mak ha’u hakarak ba fali Vikeke de’it ona,” espresa Alberto.
Avó Alberto mos presiza tebes atu husu governu liu husi Ministériu Solidariedade Sosiál no Inkluzaun (MSSI) ajuda netik kadeira roda (kursi roda) ida atu bele ajuda nia tuur iha kadeira atu labele hakdasak hanesan labarik iha rai leten.
Hafoin entrevista remata atu fahe malu, avó Alberto husu Lafaek News atu buka dalan oinsá bele hatoo informasaun ne’e ba governu hodi ajuda netik kadeira roda ida oinsá bele ajuda nia dudu iha uma laran, tanba agora la’o la di’ak.
Jornalista : Orlando Magno
Editora : Nelya Barros
