NOTÍSIA JERÁL · 19 May 2021 12:08 ·

Rezultadu Sorumutu KM, Aprova Asuntu Importante Lima


Rezultadu Sorumutu KM, Aprova Asuntu Importante Lima Perbesar

Lafaek News–Konsellu Ministrus hala’o sorumutuk iha Ministériu Finansas, Aitarak laran Dili, aprova ona projetu Dekretu-Lei, kona-ba insentivu finanseiru estraordináriu ba suku sira, ne’ebé aprezenta husi Ministru Administrasaun Estatál, Miguel Pereira de Carvalho, Kompensasaun finanseira estraordináriu ida-ne’e atribui ba Suku sira husi akréximu exesionál serbisu ne’ebé hala’o tiha ona no hodi realiza iha prezente no iha fulan oin mai, no iha rekoñesimentu nesesidade no importánsia serbisu sira ne’ebé hala’o ona husi Suku sira, iha interese no benefísiu husi Estadu Timorense, iha kontestu situasaun pandémika hanesan iha proposta governamentál ba dezastre naturál sira.

Ho nune’e, konsellu ministru mós aprova ona proposta ba akordu entre estadu Timorense no Estadu Australianu ba Projetu Koordenasaun iha área desentralizasaun administrativa territoriál no husi dezenvolvimentu infraestrutura lokál sira (PARTISIPA), sei implementa entre loron 1 fulan-jullu tinan 2021 no loron 30 fulan-juñu tinan 2031.

Programa ne’e iha eskala nasionál ida, ho elementu ezekusaun ba nivel sentrál no lokál. partisipa ne’e iha komponente tolu, komponente dahuluk mak apoiu ba programa PNDS, daruak maka kapasitasaun husi administrasaun no autoridade munisipál sira no komponente datoluk maka refere ba hadi’ak operasaun no manutensaun ba infra-estrutura sira.

Konsellu Ministru(KM) aprova ona Projetu husi Proposta Lei ba alterasaun daneen ba Lei n. 7/2006, loron 28 fulan-dezembru, kona-ba Lei Eleitorál ba Prezidente Repúblika nian, ne’ebé aprezenta mós husi Ministru Administrasaun Estatál. Projetu Proposta Lei ida-ne’e hetan ona deliberasaun iha Sorumutuk Konsellu Ministru(KM) iha loron 8 fulan-abril tinan 2021, liuliu atu introdúz alterasaun substansiál sira iha faze redasaun finál, hetan nesesáriu hodi submete nia ba deliberasaun foun husi Konsellu Ministrus.

Haree ba besik ona eleisaun prezidensiál sira tuir mai, alterasaun ida-ne’e ho objetivu hodi adekua ba situasaun atuál, iha kontestu pandemia COVID-19 nian no reforsu ba kapasitasaun ba resposta ida di’ak liu ba nesesidade sidadaun sira-nian, tanba ne’e prosede ba reforsu rekizitu formál sira kandidatura nian, ba klarifikasaun no organizasaun prosesu eleitorál no fasilita kondisaun sira kona-ba ezersísiu ba direitu votu sidadaun sira-nian.

Konsellu Ministrus apresia no endosa ona proposta ne’ebé aprezenta husi Ministru Finansas, Rui Augusto Gomes, ba segmentasaun husi Fundu Petrolíferu nian, iha Karteira Likidés no Karteira Kreximentu nian. Karteira Likidés ne’e ho objetivu atu garante finansiamentu husi transferénsia sira ba Orsamentu Jerál Estadu nian iha tinan tolu tuirmai, ne’ebé sei investe iha ativu alta likidés no baixu risku nian. Hatene katak valór restante husi Fundu bele investe iha Karteira Kreximentu nian, tuir regra sira investimentu nian ne’ebé prevee iha Lei n. 9/2005, loron 3 fulan-agostu, Lei Fundu Petrolíferu nian.

Hafoin analiza aprezentasaun husi pontu situasaun epidemiolójika país nian, husi Sala Situasaun Sentru Integradu Jestaun Krizes, Konsellu Ministru delibera ona mós propoin ba Prezidente Repúblika, Francisco Guterres Lú Olo, renovasaun estadu emerjénsia, ba loron tolunulu tan. delibera ona atu propoin ba Sua Exelénsia, Señór Prezidente Repúblika, Francisco Guterres Lú Olo, renovasaun estadu emerjénsia nian, ba loron tolu nulu tan.

Haree ba evolusaun preokupante husi situasaun epidemiolójika no proliferasaun ba kazu sira ne’ebé mak rejista ona husi kontájiu COVID-19 nian, no atu evita no neutraliza risku sira husi propagasaun SARS-CoV-2, atu nune’e bele proteje saúde públika no iha kbiit atu hatán ba Sistema Nasionál Saúde nian, Governu propoin ba Señór Prezidente Repúblika katak, ho renovasaun estadu emerjénsia nian ne’e, permite atu suspende ka limita direitu no garantia fundamentál balun.

Timor-Leste rejista ona kazu akumuladu totál hamutuk 4765 dezde inísiu pandemia nian. Husi kazu ativu daudaun ne’e hamutuk 2238, rejista ona iha Munisípiu Dili hamutuk 1851, 128 iha Baukau, 101 ha Kovalima, no 75 iha Vikeke. Taxa insidénsia iha nivel nasionál maka abitante rihun 13,8 /100 no iha Dili abitante rihun 42,5/100.

To’o ohin loron 3,3% husi populasaun maka simu ona doze dahuluk husi vasina kontra COVID-19. Iha faze dahuluk vasina ona ema besik 28600 no iha faze daruak nian, dezde loron 10 fulan-maiu, ema hamutuk 20094 maka simu ona vasina.

Konsellu Ministrus aprova ona projetu Rezolusaun Governu nian, ne’ebé aprezenta husi Ministru Prezidénsia Konsellu Ministrus, Fidelis Manuel Leite Magalhães, ne’ebé define objetivu sira ba kampaña vasinasaun nian no orientasaun hodi asegura kumprimentu husi medida preventiva sira iha vigór. Rezolusaun Governu ne’e define hanesan objetivu atu alkansa iha kampaña vasina nian, loron ida númeru vasina 5000, ne’ebé orienta departamentu relevante sira ho hanoin atu kria mekanizmu nesesáriu sira hodi aselera ritmu vasinasaun nian.

Fó mós orientasaun ba departamentu sira Governu nian ho hanoin atu prevene regulamentu internu nesesáriu sira hodi asegura kumprimentu husi medida preventiva sira iha vigór iha funsionamentu internu husi servisu sira no iha atendimentu públiku.

Vasinasaun parsiál ka kompleta define ona hanesan kritériu relevante hodi adota husi administrasaun públika iha determinasaun husi funsionáriu sira iha rejime serbisu prezensiál.

Ikus liu, Ministru Koordenadór Asuntus Ekonómikus, Joaquim Amaral, halo ona aprezentasaun ida kona-ba pontu situasaun prosesu adezaun Timor-Leste nian ba Organizasaun Mundiál Komérsiu (OMK). Daudaun ne’e, Timor-Leste iha estatutu país observadór no iha hela prosesu negosiasaun adezaun ba OMK nian, atu bele hamutuk ho país 164 ne’ebé maka hola parte ona iha organizasaun. OMK ne’e hanesan organizasaun ida-ne’ebé regula regra sira komérsiu nian entre país sira, ho objetivu atu garante katak atividade komersiál hotu-hotu la’o ho forma ne’ebé fasil, livre no previzivel posivel. Governu Timor-Leste, liuhusi ekipa negosiasaun ne’ebé lidera husi Ministru Koordenadór Asuntus Ekonómikus prepara hela atu partisipa iha sorumutuk daruak Negosiasaun Altu Nivel husi Grupu Traballu OMK nian ne’ebé sei realiza iha fulan jullu tinan 2021.

 

(Media GPM)

1,019 Views
Artikel ini telah dibaca 52 kali

Baca Lainnya

Guarda Floresta Foun Hamutuk 807 Sei Asina Kontratu Asegura Ailaran

1 April 2024 - 15:41

Uma Kain 72 Hetan Estragus Hosi Dezastre Naturais iha Semana Ne’e

25 March 2024 - 17:21

CVTL Ensera Treinamentu Primeira Sokorru Durante Loron 3 Ba Jornalista TL

24 March 2024 - 13:28

Xefe Suku Komoro Ho Komunidade Limpeza Merkadu

3 March 2024 - 09:17

CNC Asina Nota Entendimentu ho Asosiasaun Profissionais Psikolojia Timor-Leste

29 February 2024 - 08:58

LH Rezeita Adezaun ba WTO, Presiza Proteje no Promove Ekonomia Rai Laran

27 February 2024 - 17:11

Trending di NOTÍSIA JERÁL