LafaekNews-Arsebispo Metropolitano, Dom Vergilio do Carmo da Silva, hato’o Kongratulasaun ba Asuwa’in no povu Timor-Leste tomak ba komemorasaun restaurasaun indepedénsia Timor-Leste ba dala sanulu resin sia (19).
“Ha’u nia Parabens ba povu doben Loron ida atu foti matan hateke ba leten agradese ba maromak ne’ebé nunka abandona povu ne’e iha nia istória no luta ba libertasaun”, Kongratula husi Arsebispo Metropolitano Dom Vergilho do Carmo, liu husi Komunikadu Imprensa iha nia rezidensia Lecidere, Kuarta (19/05/2021)
Arsebispu hateten, iha komemorasaun loron importante ida-ne’e atu hateke ba kotuk atu agradese ba Timor oan hotu ne’ebé kontribui ona ba Timor nia ukun rasik an, ba sira ne’ebe mate no liu-liu sira ne’ebé nia naran too oras ne’e la tama iha lista no ema la temi, atu nai maromak haraik ba sira rahun di’ak lalehan tanba loron ida-ne’e atu povu asuwa’in no fiar na’in, kaer liman hamutuk hateke ba oin no hamutuk hakat ba oin husik ida-idak na interese hasoru krize ne’ebé iha ita nia oin, afirma Arsebispu.
“Nune’e komemora loron restaurasaun Independensia ba dala 19 iha situasaun ida difisil, konvida povu asuwa’in no fiar na’in hotu atu kaer liman humutuk no husu ba ita nia an “saida mak ita tenke halo atu ita sai husi susar ida nee?” dehan líder relijiozu ne’e.
Líder Relijiozu ne’e akresenta, liu tiha akontesimentu 4 de Abril 2021 saida mak ita haree? la’ós Timor oan rasik, husi rai laran nune’e mós rai liur ne’ebé la sente hakmatek bainhira haree nia maluk Timor oan ne’ebé iha susar laran, ho situasaun ne’e obriga Timor oan barak la tauk atu hakat ba sentru akollimentu sira nune’e mos la mo’e atu lolo liman, fo tulun maluk sira ne’ebé iha susar, maibé seidauk hotu, inimigu ne’ebé obriga ita atu luta hamutuk atu halakon mak covid-19
“Loron restaurasaun nian ba dala 19 ne’e uniku, maske laiha barullu barak la signifika ita atu husik liu deit, maibe situasaun ne’e duni mak obirga ita atu hafoun ita nia espiritu Nasionalizmu, ikus liu mai ita dala ida tan saran rai ida ne’e ba maromak nia mizericordia iha ita Nia preparasaun ba festa Espirito Santo nian, no liu housi Intercessão Nain Feto Imaculada nian atu Timor oan hatene haraik an ba malu, perdua malu, simu malu no hamutuk buka atu sai hosi susar ne’ebe iha ita nia oin,” Arsebispu ne’e.
Jornalista : Rita Moniz
Asisten Editór : Egidio Nono
