Lafaek News—Sekretáriu Estadu Komunikasaun Sosiál (SEKOMS), Mericio dos Reis ‘Akara’, lansa ona plataforma dijital hodi kombate informsaun falsu sira ne’ebé lansa iha MedSos, husu públiku lalika fiar identidade (ID) falsu sira.
“Ohin ita konsege lansa plataforma dijital primeiru, ho intensaun hakarak halibur informasaun falsu sira ‘Hoax’ ne’ebé id falsu no id los sira lansa iha media sosiál,” informa, SEKOMS, Mericio dos Reis ‘Akara’ ba Jornalista sira iha edifisiu SEKOMS, kuarta, (19/05/2021).
Nia esplika, plataforma ida ne’e forma ekipa atu tau matan ba notisia falsu iha medsos atu halibur nue’e bele ajuda hodi halo edukasaun sivika ba sidadaun sira ne’ebé gosta informasaun ne’ebé kredivel.
“Dadus ne’e kompletu hodi ajuda ita atu halo planu edukasaun sivìka ba ita nia sidadaun sira, tanba fenomena agora akontese hela gosta like informasaun falsu ka hoax hodi fahe tutan, ida ne’e mak domina liu notisia ne’ebé maka mai husi média kredivel ne’e sidadaun sira ladun like no fó komentariu hodi fahe tutan,” tenik Akara.
Akara dehan, SEKOMS nia kontribuisaun hamutuk ho media sira atu promove informasaun ne’ebé maka loos, maibé plataforma ne’e mos la ho intensaun atu kontrolu no dilimite ema nia liberdade imprensa no espresaun.
“Ita nia ekipa atu tau matan no ajuda ita nia sidadaun atu kompriende no konsumu Informasaun ne’ebé mak loos no kredivel, ida ne’e tama iha ID falsu ka hoax la presiza fiar tanba governu iha responsabilidade boot ba nia sidadaun atu asegura nia sidadaun nia direitu prinsipal mak tenke hetan informasaun ne’ebé mak loos,” nia informa.
Enkuantu durante ne’e SEKOMS deteta ona dadus 29 ne’ebé utiliza id falsu sira ne’ebé maka durante lansa informasaun falsu, plataforma ida ne’e sei kontinua dezenvolve monitoriza notisia falsu sira iha média sosiál kada fulan tolu, hodi hatudu ba públiku, nune’e bele kategoria ida ne’e informasaun falsu favor labele fiar, fiar mak notisia loos mai husi fontes kredivel.
Jornalista : Rita Moniz
Asisten Editór : Pedro de Almeida
