Lafaek News—Veteranus munisípiu Lautém postu administrativu Iliomar, ezije lider nasional sira atu tuur hamutuk ho ho hanoin ida buka solusaun ba problema veteranus Timor Leste.
Asuntu ne’e hatoo hosi veteranu Carlos da Costa kódigu “Resi Lafu” hodi husu ba Ministru Asuntu Veteranus Oan Soru atu ko’alia ho lider nasional sira atu koa’lia problema veteranus atu bele hetan lalais solusaun.
“Ami nia ezizensia mai nafatin husu ba ministro hodi ezize ba Lider másimu hirak ne’ebé lidera funu iha Ailaran hanesan Presidente Repúblika, Jose Ramos Horta, Primeiru Ministro Kay Rala Xanana Gusmão, Mari Alkatiri,Taur Matan Ruak, Lere Anan Timor ho Lú Olo sira labele fahe malu uluk halo funu sira hamutuk agora tenke buka meius oinsa resolve ami nia problema Veteranos.”Afirma Carlos da Costa “Resi Lafu’’
Resi Lafu afirma, bainhira lider nasional sira la tuur hamutuk hodi rezolve asuntu veteranus mak nia parte sei organiza membru veteranu sira hodi ezije ministru asuntu veteranu hodi rezolve problema veteranus iha rai laran.
Hatan ba Preokupasaun ne’e Ministru Asuntu Veteranus, Gil da Costa “Oan Soru” fo sai katak, nia parte nafatin koopera ho orgaun estadu sira atu buka solusaun ba preokupasaun no lamentasaum vetaranos sira nian kona-ba alterasaun lei númeru 3/2006 estatutu kombatente libertasaun nasional ne’ebé CCLN rasik halo kona-ba levantamentu dadus veteranus sira nian.
“Sira mai hatoo lamentasaun ne’ebé durante ne’e sira sente iha no ko’alia buat balun relasiona ho alterasaun lei númeru 3/2006 estatutu Kombatente Libertasaun nasional ne’ebé altera ona ba dala tolu iha tinan 2024, sira mai apresenta atu ami bele haree ba oin iha nafatin posiblidade ka lae atu bele fo solusaun ba sira nia problema” Ministro Asunto Veteranos Gil da Costa “Oan Soru” sub;oma.
Gil da Costa “Oan Soru” reforsa katak, alterasaun lei númeru 3 / 2006 estatutu kombatente libertasaun nasional bazeia ba konstituisaun no laiha intensaun atu deskrimina ema ruma ne’ebé hola parte iha luta ba funu libertasaun nasional.
Jornalista : Natalino Lopez
