Lautem-(Lafaek News)—Xefe Departamentu Eletrisidade Timor Leste (EDTL), munisípiu Lautém, Siquito dos Santos, informa EDTL Lautém prontu sai empreza públiku atu hakbesik servisu ba povu ho razaun kada tinan produz reseitas $.24.941, 43. ba kofre estadu.
Siquito dos Santos informa, funsionáriu EDTL Laútem hamutuk 21 kompostu husi feto rua mane 19, no funsionáriu 21 ne’e muda ona sira nia estatutu ba empreza públiku.
“Ami da-daun ne’e hein hela tanba iha transformasaun ida ne’e iha buat tolu ne’ebé mak sira fó mai ami, primeiru autonomia ba finanseriu, autonomia ba administrativu no judisiáriu ne’ebé forsa hodi regular kulakér empreza nia servisu, da-daun ne’e ami hein hela ida ne’e ita nia ekipa husi nasionál da-daun ne’e prepara hela buat sira ne’e, prepara hotu ona sei manda mós mai iha munisípiu hodi implementa,” katak xefe departamentu EDTL ne’e ba jornalista iha sira Lautém, segunda (15/02/21).
Siquito fundamenta, Servisu eletrisidade munisípiu Lautém prontu atu muda ba empreza públiku atu nune’e hakbesik servisu EDTL nian ba komunidade sira iha area remotas nune’e bele hatama reseitas ba kopre estadu.
Tanba, kada tinan EDTL Lautém hatama reseitas 24.941, 43 Dollares Amerikanu, ho ida ne’e Índika mós EDTL Lautém sai duni empreza públika ho totál funsionarius 21 kompostu husi feto rua no mane 19 muda hotu ona ba empreja publika.
“Ami nia funsionáriu sira ba empreza públiku ba automatikanente no funsionáriu sira hotu prontu hodi implementa tuir mata dalan empreza nian ne’ebé iha, bazeia ba informasaun ne’ebé mak ami hetan tradisaun EDTL ba empreza públika durante tinan rua, komesa husi dia 1 de Janeiru 2021,empreja mós sei halo evalusaun mai ami funsionariu sira kontinua mantein ho funsionariu públiku ka muda ba empreza públika,” katak nia.
Entretantu, ba da-daun kliente EDTL iha munisípiu Lautém ne’e hamutuk 12.209, ho totál kliente ne’ebé uza ona prepagu 5.660, seidauk instala kontadór prepagu kliente hamutuk 5.495, kliente mak EDTL seidauk monta prepagu, no husi totál suku 34 ho aldeia 151 kuaze asesu ona enerjia eletrisidade no aldeia ne’ebé seidauk asesu enerjia eletrisidade iha Lautém hamutuk 22 iha munisípiu Lautém seidauk assesu ba enerjia eletrisidade.
Jornalista : CE Lautém
Editora : Nelya Barros
