Lafaek News—Ajénsia Internasionál Peace Wids Japan (PWJ) distribui ai-han no sasan uma laran ba vitima dezastre naturais iha fulan Abril liu-ba ho totál benefisiariu 262 ba Aldeia Frecat suku Bairro-Pite, postu administrativu Dom Aleixo, munisípiu Dili.
Koordenadór projetu redusaun risku dezastre, José da Silva Ramalho hatete, antes iha suku Bairro Pite finaliza ona distribuisaun nesesidade báziku ba Aldeia rua mak hanesan Aldeia Licarapoma no Rai Nain.
“Benefisiariu Licarapoma hamutuk uma kain 311, soke balun iha naran dupla no balun sei iha foho, tanba ne’e benefisiariu tun ba 216 no Rai nain kobre uma kain 52, maibé ida ba tiha foho tanba ne’e redúz ba benefisiariu 51,” dehan Koordenadór projetu redusaun risku dezastre, José da Silva Ramalho, iha sede suku bairro pite, hafoin distribui nesesidade báziku, Tersa (17/08/2021).
Kordenadór hatutan, antes ne’e sira kordena ho protesaun Sivíl no identifika suku rua mak hanesan Suku Hera kobre Aldeia ha’at no suku Bairro pite kobre Aldeia tolu.
“Ohin halo distribuisun ba Aldeia Frecat ho totál benefisiariu bazea data ne’ebé mak asesu husi protesaun Sivíl ba Aldeia Frecat Totál benefisiariu hamutuk 276, maibé PWJ halo quality check deteta naran dupla purvolta sanolu resin ha’at, tanba ne’e redúz totál uma kain hamutuk 262 husi numeiru ne’e faze dahuluk ami fahe ba benefisiariu 150 no aban ba faze daruak benefisiariu 112,” dehan José da Silva Ramalho.
Nia salienta, pakote distribuisaun iha oin rua mak hanesan food iha saku bo’ot ida no non-food iha saku bo’ot ida. Pakote food mak hanesan foos, supermi, mina, kafé masmidar, susu been no lata sardina no biskuit sira no Non- food mak hanesan bikan, kanoru, tasu, sana biti, lipa, toilla, gayun, sakola.
Nia dehan, Ajensia Internasionál Peace Wids Japan (PWJ hetan apoiu finanseiru husi plataforma Japaun ba atividade rua mak hanesan apoiu food no non-food ba vítima dezastre naturais sira no seluk mak halo intervensaun no normalizasaun ba mota sira ne’ebé hetan impaktu husi inundasaun iha dia 4 Abril liu ba.
“Umanitariu ne’e lamerese atu esplika ho liafuan, maibé ne’e kestaun domin, tanba ne’e povu Japaun liuhusi plataforma Japaun ajuda no lolo liman ba Timor liuhusi fó apoiu,” tenik nia
Enkuantu nia imforma, planu tuir mai projeta sei ba suku Motael ho totál benefisiariu hamutuk 324 ba Aldeia ida ho naran Halibur no servisu hamutuk ho protesaun Sivíl atu hare’e ba kalendariu distribuisaun nian.
Jornalista : Felisberto Fernandes
Asisten Editór : Pedro de Almeida
