Lafaek News-Delegasaun husi Korea iha Timor-Leste hala’o sorumutu prinspál ho lider relijíozu hotu iha Timor-Leste, hodi promove fi’ar, paz, amezade no rekonsiliasaun nune’e dezenvolve área turistíka iha Timor-Leste.
Relijiozu hirak ne’ebé partisipa iha sorumutu ne’e mak hanesan Relijíozu husi Katolik, Izlam ka Muslumanu, Buda, Protestante no Konfuchu, ne’ebé realiza husi HEAVEN CULTURE, WORLD PEACE, RESTORATION OF LIGHT (HWPL) iha Majid Annur Kampung Alór Dili.
“Sorumutu ne’e hanesan papél ida atu promove fi’ar, Unidade, amizade no natureza ka fuan, maibé iha tempu hanesan mós atu promove Paz no rekonsiliasaun hodi dezenvolve rai ida ne’e ba ninia objetivu tomak,”informa Diretór Ezekutivu Assosiasaun Turizmu Relijiozu Timor-Leste (ATRTL) Manuel Vong, ba Jornalista sira iha Resintu Májid Anuur, (27/11/2023).
Diretór Ezekutivu ne’e mós relata, hanesan Timoroan ne’ebé maiória sarani katólika tenke halo tuir Nai Maromak Nia ukun fuan liu-liu ukun fuan dame no domin nian no tenke simu ideias husi ema sira ne’ebé hakarak promove paz amezade liuhusi maneira oin-oin nune’e bele hadi’a rai ne’e ba oin.
Tamba liuhusi promove paz, amezade no rekonsiliasaun hanesan parte esensial oinsá bele atrai tuirsta sira liu-liu turista husi nasaun sira seluk. Nune’e, liuhusi servisu hamutuk entre ATRTL ho relijíozu lima (5) ne’e, espera bele kria kondisaun hodi dada turista husi rai liur mai vizita fatin tuiristika iha TL.
“Prinsípiu husi ATRTL nian maka hakarak sai Masin no Naroman ba dezenvolvimentu turizmu ne’e rasik, i turizmu ne’e labele dezenvolve husi seitór ekonómika no fizíka de’it, maibé tenke dezenvolve mós husi prespetiva spirituál nian. Tamba ne’e maka ATRTL hakarak servisu ba iha dezenvolve ema nia isín no klámar,”dehan Vong.
Fatin hanesan, Prezidente Konsello Kuradór no Fundadór Fundasaun Annur Timor-Leste, Abdullah Said Sagran reforsa liután katak, hanesan humana ne’ebé moris iha rai ne’e presija atu servi no tulun malu no presija hametin paz no amezade tuir Nai Maromak Nia Ukun fuan nuene’e bele sai Maromak nia oan lolos maska fi’ar lahanesan.
“Maibé objetivu fi’ar ida de’it ba Maromak. Enkuantu ita servi horizontalmente ho ita nia maluk sira, ita mós tenke servi ba verticalmente ho Maromak,”Ahdullah fo hanoin.
Entertantu, iha okaziaun ne’e mós Vise Prezidente Assosiasaun Turizmu Relijíozu Timor-Leste (ATRTL), Pastor Lorenço dos Santos, iha nia diskursu hateten, hanesan ema ne’ebé iha diferénsa fi’ar maibé tenke banati tuir saida maka Maromak hateten ona katak sei hadomi malu to mundu remata, tamba ho domin maka bele lori ema to’o iha moris rohan la’ek.
Tan ne’e hanesan ema kriatura tenke kria situasaun ne’ebé di’ak liuhusi hametin dame, unidade ba ema hotu, tamba Nai Maromak nunka hanorin ema atu fahe malu tan de’it ras, relijiaun, lian no identidade.
Enkuantu, iha eventu akadémia dame relij’iozu ne’e hetan partisipasaun husi Delegasaun HWPL ne’ebé mai husi Korea, delegasaun husi embaixada korea, Lideres relijiaun lima iha Timor-Leste no eventu ne’e rasik hala’o iha sala sekretariadu Májid Annur, kampung Alór Dili.
Estajiadu : Andre da Costa
Editor : Marcos da Silva Araujo
